સંસદના ચાલુ ચોમાસુ સત્ર દરમિયાન 'એક દેશ, એક ચૂંટણી' મુદ્દે મહત્વપૂર્ણ અપડેટ સામે આવ્યું છે. અગાઉ એવી અટકળો ચાલી રહી હતી કે કેન્દ્ર સરકાર આ સત્રમાં બંધારણીય સુધારા સાથે જોડાયેલું બિલ રજૂ કરી શકે છે. જોકે હવે સ્પષ્ટ થઈ ગયું છે કે આ બિલ હાલના ચોમાસુ સત્રમાં રજૂ કરવામાં આવશે નહીં અને તેના પર કોઈ ચર્ચા પણ નહીં થાય.
સંયુક્ત સંસદીય સમિતિના કાર્યકાળમાં વધારો કરવામાં આવ્યો
આ બિલની તપાસ માટે રચાયેલી સંયુક્ત સંસદીય સમિતિ (JPC)ના કાર્યકાળમાં વધારો કરવામાં આવ્યો છે. સમિતિને હવે પોતાની અંતિમ રિપોર્ટ સંસદના શિયાળુ સત્રના છેલ્લા સપ્તાહના પ્રથમ દિવસે રજૂ કરવાની સમયમર્યાદા આપવામાં આવી છે. કાર્યકાળ લંબાતા હવે સ્પષ્ટ બન્યું છે કે હાલના સત્રમાં JPC પોતાની રિપોર્ટ રજૂ કરશે નહીં. આ નિર્ણયથી 'એક દેશ, એક ચૂંટણી' સંબંધિત કાયદાકીય પ્રક્રિયા પણ આગળ ધપશે નહીં. હવે સમિતિનો અહેવાલ રજૂ થયા બાદ જ સરકાર આગામી પગલાં ભરી શકશે. એટલે કે, આ મહત્વાકાંક્ષી સુધારા અંગેની ચર્ચા અને સંભવિત બિલ પરની કાર્યવાહી હવે શિયાળુ સત્ર દરમિયાન થવાની શક્યતા છે.