ભારતીય તપાસ એજન્સીઓએ વિદેશમાં બેસીને ભારતમાં ડ્રગ્સ ટેરર અને સંગઠિત ગુનાખોરી ચલાવતા માફિયાઓ વિરુદ્ધ અત્યાર સુધીનું સૌથી મોટું આંતરરાષ્ટ્રીય અભિયાન 'ઓપરેશન ગ્લોબલ હન્ટ' શરૂ કર્યું છે. આ મિશન હેઠળ NCB, CBI, ED અને NIA જેવી કેન્દ્રીય એજન્સીઓ ઈન્ટરપોલ સાથે મળીને 100 જેટલા ફરાર ગુનેગારોને ભારત પાછા લાવવા માટે કામ કરી રહી છે.
ડ્રગ્સ અને સાયબર ગુનેગારો પર ગાળિયો
આ ઓપરેશનનો મુખ્ય ઉદ્દેશ્ય આંતરરાષ્ટ્રીય ડ્રગ્સ સિન્ડિકેટ, સાયબર ગુનેગારો અને આર્થિક અપરાધીઓને પકડવાનો છે. તપાસ એજન્સીઓના જણાવ્યા અનુસાર, ઘણા ગુનેગારો વિદેશમાં રહીને ભારતમાં ડ્રગ્સની સપ્લાય અને આર્થિક છેતરપિંડીના નેટવર્કનું સંચાલન કરે છે. તાજેતરમાં જ દાઉદ ઈબ્રાહિમના નજીકના સાથી સલીમ ડોલાને તુર્કીથી ડિપોર્ટ કરીને ભારત લાવવામાં સફળતા મળી છે.