વાણિજ્ય મંત્રી પીયૂષ ગોયલે બોલિવૂડને ભારતની સૌથી મોટી સાંસ્કૃતિક નિકાસ ગણાવ્યું છે. તેમણે કહ્યું કે બોલિવૂડ દુનિયાભરમાં ઓળખાતી બ્રાન્ડ છે. નવી દિલ્હીમાં આયોજિત ચોથા 'ફેસ્ટિવલ ઑફ આઇડિયાઝ'માં બોલતાં ગોયલે એ દલીલને ફગાવી દીધી હતી કે ભારત વૈશ્વિક બ્રાન્ડ બનાવવામાં નિષ્ફળ રહ્યું છે. તેમણે કહ્યું કે ભારતની અસલી તાકાત તેના લોકો, પ્રતિભા અને બોલિવૂડ જેવી સાંસ્કૃતિક ઓળખમાં છે.
વિદેશી નેતાની દીકરી બોલિવૂડમાં કામ કરવા માગે છે: ગોયલ
હિન્દી ફિલ્મ ઉદ્યોગની વૈશ્વિક પહોંચ સમજાવવા માટે પીયૂષ ગોયલે એક વિદેશી નેતા સાથે જોડાયેલો કિસ્સો પણ સંભળાવ્યો હતો. તેમણે કહ્યું, “દુનિયાના સૌથી શક્તિશાળી દેશોમાંના એકના નાયબ વડાપ્રધાન મારી પાછળ પડ્યા છે, કારણ કે તેમની દીકરી બોલિવૂડ સાથે કામ કરવા માગે છે.”
પવન ખેડાએ પીયૂષ ગોયલ પર સાધ્યું નિશાન
ગોયલના આ નિવેદન પર કોંગ્રેસના સાંસદ પવન ખેડાએ નિશાન સાધ્યું હતું. તેમણે સવાલ કર્યો કે શું ગોયલ ભાજપમાં પોતાના આગામી રાજકીય કરિયર માટે ઓડિશન આપી રહ્યા છે? ખેડાએ સોશિયલ મીડિયા પ્લેટફોર્મ X પર લખ્યું, “દિવસે વાણિજ્ય મંત્રી, રાત્રે બોલિવૂડના કાસ્ટિંગ એજન્ટ.”
વર્ક-લાઇફ બેલેન્સને લઈને વિવાદ
ગોયલની આ ટિપ્પણી એવા સમયે આવી છે, જ્યારે થોડા દિવસ પહેલાં ભારત-નેધરલેન્ડ બિઝનેસ ફોરમમાં રોકાણકારો સાથે વાતચીત દરમિયાન કામના કલાકો અને વર્ક-લાઇફ બેલેન્સ અંગેના તેમના નિવેદનથી વિવાદ ઊભો થયો હતો.
ભારતને રોકાણ માટે વધુ સારો દેશ ગણાવતાં ગોયલે કહ્યું હતું, “ભારતીયો સખત મહેનત કરવા માગે છે. ભારતમાં તમને કોઈ સાંજે 5 વાગ્યે કામ બંધ કરવાનું નહીં કહે. અને ચોક્કસપણે કોઈ ભારતીય તમને એ યાદ નહીં અપાવે કે આજે વીકએન્ડ છે.”
કેરળ આઇટી વર્કર્સ યુનિયન (KITU) સહિતના ટીકાકારોએ ગોયલ પર લાંબા કામના કલાકો અને કામના વધુ પડતા દબાણને પ્રોત્સાહન આપવા તેમજ વર્ક-લાઇફ બેલેન્સને અવગણવાનો આરોપ લગાવ્યો હતો. યુનિયને આ મુદ્દાની સરખામણી ઇન્ફોસિસના સ્થાપક નારાયણ મૂર્તિએ શરૂ કરેલી કામના કલાકો અંગેની ચર્ચા સાથે કરી હતી.
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d
