આ મુલાકાત દરમિયાન એસ.જયશંકરે બંને પડોશી દેશો વચ્ચે દ્વિપક્ષીય સંબંધો જાળવવા અને આગળ વધારવામાં હમીદુલ્લાહના યોગદાનની પ્રશંસા કરી હતી.
ભવિષ્ય માટે શુભકામનાઓઃ એસ.જયશંકર
વિદેશ મંત્રી એસ. જયશંકરે 4 ઓક્ટોબરના રોજ નવી દિલ્હીમાં ભારતમાં બાંગ્લાદેશના હાઈ કમિશનર રિયાઝ હમીદુલ્લાહ સાથે મુલાકાત કરી અને ભારત-બાંગ્લાદેશ સંબંધોમાં તેમના યોગદાનની પ્રશંસા કરી. બેઠક બાદ, જયશંકરે સોશિયલ મીડિયા પ્લેટફોર્મ 'X' પર લખ્યું, "તેમની વિદાય મુલાકાત દરમિયાન બાંગ્લાદેશના હાઈ કમિશનર રિયાઝ હમીદુલ્લાહને મળીને આનંદ થયો. હું તેમના યોગદાનની પ્રશંસા કરું છું અને ભવિષ્ય માટે તેમને શુભકામનાઓ પાઠવું છું."
કોણ છે રિયાઝ હમીદુલ્લાહ ?
રિયાઝ હમીદુલ્લાહએ ગયા વર્ષે એપ્રિલમાં ભારતમાં બાંગ્લાદેશના હાઈ કમિશનરનું પદ સંભાળ્યું હતું. નવી દિલ્હીમાં બાંગ્લાદેશ હાઈ કમિશનરમાં જોડાતા પહેલા, તેમણે બાંગ્લાદેશના વિદેશ મંત્રાલયમાં સચિવ તરીકે સેવા આપી હતી. અગાઉ, 1 ઓક્ટોબરના રોજ, બાંગ્લાદેશમાં ભારતીય હાઈ કમિશનર દિનેશ ત્રિવેદી અને બાંગ્લાદેશના મુક્તિ યુદ્ધ બાબતોના મંત્રી અહેમદ આઝમ ખાન ઢાકામાં મળ્યા હતા. તેમણે પરસ્પર હિતના મુદ્દાઓ પર ચર્ચા કરી હતી.
સંબંધોને વધુ મજબૂત કરવા પર ધ્યાન
ઢાકામાં ભારતીય હાઈ કમિશને ગુરુવારે X પર પોસ્ટ કર્યું હતું, "હાઈ કમિશનર દિનેશ ત્રિવેદીએ 30 સપ્ટેમ્બરના રોજ બાંગ્લાદેશના મુક્તિ યુદ્ધ બાબતોના મંત્રી અહેમદ આઝમ ખાન સાથે મુલાકાત કરી હતી. બંને પક્ષોએ પરસ્પર હિતના મુદ્દાઓ પર મંતવ્યો શેર કર્યા હતા અને ભારત અને બાંગ્લાદેશ વચ્ચે લાંબા સમયથી ચાલતા સંબંધો અને સહયોગનો પુનરોચ્ચાર કર્યો હતો." 30 સપ્ટેમ્બરના રોજ, ત્રિવેદીએ ઢાકામાં બાંગ્લાદેશના વિદેશ રાજ્યમંત્રી હુમાયુ કબીર સાથે પણ મુલાકાત કરી હતી. બંને પક્ષોએ ભારત અને બાંગ્લાદેશ વચ્ચે સહયોગ અને સંબંધોને વધુ મજબૂત બનાવવાની રીતો પર ચર્ચા કરી હતી.
આ પણ વાંચોઃ એસ.જયશંકરે કહ્યું, અમેરિકાએ પોતાની રણનીતિથી જાતે જ દુનિયામાં એકલા પડી જવાનું પસંદ કર્યું!