Seva Sankalp campaign: દેશના રક્ષા મંત્રી રાજનાથ સિંહ વડાપ્રધાન નરેન્દ્ર મોદીના જન્મદિવસ નિમિત્તે ‘સેવા સંકલ્પ અભિયાન’ની શરૂઆત માટે કોલકાતા પહોંચ્યા છે. 17 સપ્ટેમ્બરે પીએમ મોદીનો જન્મદિવસ છે અને ત્યારબાદ તેમના જાહેર જીવનના 25 વર્ષ પૂર્ણ થવાના છે. આ અભિયાન 17 સપ્ટેમ્બરથી શરૂ થવાનું જાહેર કરવામાં આવ્યું છે.
‘મોદીનૉમિક્સ’ અંગે રાજનાથ સિંહનું નિવેદન
પ્રેસ કોન્ફરન્સમાં રાજનાથ સિંહે સરકારની કામગીરીનો ઉલ્લેખ કરતા કહ્યું કે દેશમાંથી વધુ પડતા નિયમો અને ઓછા ગવર્નન્સની વિચારસરણી બદલવામાં આવી છે. તેમના જણાવ્યા મુજબ હવે યોગ્ય નિયમો અને સારી ગવર્નન્સ પર ભાર મૂકવામાં આવ્યો છે, જેને તેમણે ‘મોદીનૉમિક્સ’ ગણાવ્યું. તેમણે કહ્યું કે મોદીને સમજવા માટે ભારતને સમજવું જરૂરી છે અને લોકોનો વિશ્વાસ તેમની મુખ્ય મૂડી છે.
https://twitter.com/rajnathsingh/status/2100174058243735713
વીજળી, DBT અને ભ્રષ્ટાચાર અંગે દાવો
રાજનાથ સિંહે કહ્યું કે ગુજરાત દેશનું એવું રાજ્ય હતું જ્યાં દેશના અન્ય ભાગો કરતાં પહેલાં દરેક વિસ્તારમાં વીજળી પહોંચાડવામાં આવી હતી. તેમણે મહિલાઓના બેંક ખાતા વધ્યા હોવાનો અને DBT દ્વારા લોકોના ખાતામાં સીધા પૈસા પહોંચાડવામાં આવતા હોવાનો ઉલ્લેખ કર્યો. તેમણે એવો પણ દાવો કર્યો કે સરકાર દ્વારા ₹3 લાખ કરોડથી વધુની લીકેજ રોકવામાં આવી છે, જે અગાઉ વચેટિયાઓ સુધી જતી હતી.
PM મોદીના નેતૃત્વમાં ભારત આગળ વધી રહ્યું છે
રાજનાથ સિંહે કહ્યું કે વડાપ્રધાન મોદીના નેતૃત્વમાં ભારત ઝડપથી આગળ વધી રહ્યું છે. તેમણે પશ્ચિમ બંગાળમાં ચાલી રહેલા વિકાસ કાર્યોનો પણ ઉલ્લેખ કર્યો અને કહ્યું કે આગામી સમયમાં પશ્ચિમ બંગાળ વિશ્વનું સૌથી મોટું શિપ-બિલ્ડિંગ હબ બની શકે છે.
જન્મદિવસે દીવા પ્રગટાવાશે
રાજનાથ સિંહે જણાવ્યું કે NDAના સહયોગી પક્ષોએ એક વર્ષ સુધી દેશના વિકાસ માટે કામ કરવાનો સંકલ્પ લીધો છે. અભિયાન અંતર્ગત 12 કાર્યક્રમો નક્કી કરવામાં આવ્યા છે. વડાપ્રધાનના જન્મદિવસે દીવા પ્રગટાવવા ઉપરાંત દેશ માટે યોગદાન અને સામાજિક કાર્યો કરવામાં આવશે. જે લોકો જનસેવા માટે 25 મિનિટ આપશે, તેમને પણ સેવા કાર્યમાં જોડાવાની તક આપવામાં આવશે.