બિહાર વિધાનસભાની ચૂંટણીમાં રાષ્ટ્રીય જનતાંત્રિક ગઠબંધન (NDA)ની પ્રચંડ જીત બાદ હવે નવા મંત્રીમંડળના ગઠનની તૈયારીઓ અંતિમ તબક્કામાં છે. સૂત્રોના જણાવ્યા અનુસાર, ગઠબંધનમાં મંત્રીપદની વહેંચણીનું ફોર્મ્યુલા તૈયાર થઈ ગયું છે, જે હેઠળ BJPને સૌથી વધુ પ્રતિનિધિત્વ મળશે. ફોર્મ્યુલા મુજબ, ભાજપના કોટામાંથી 15 થી 16 મંત્રીઓ સામેલ થવાની સંભાવના છે. જ્યારે જનતા દળ યુનાઈટેડ (JDU)ના ક્વોટામાંથી મુખ્યમંત્રી સહિત 14 મંત્રીઓ શપથ લઈ શકે છે. આ સાથે, ગઠબંધનની એકજૂટતા દર્શાવવા માટે અન્ય સહયોગી પક્ષોને પણ યોગ્ય સ્થાન આપવામાં આવ્યું છે, જે મંત્રીમંડળમાં તમામ દળોની ભાગીદારી સુનિશ્ચિત કરે છે.
સહયોગી પક્ષોને પણ મળ્યું પ્રતિનિધિત્વ
મંત્રીમંડળના આ ફોર્મ્યુલામાં નાના સહયોગી પક્ષો માટે પણ 'ગુડ ન્યૂઝ' છે. સૂત્રોના જણાવ્યા મુજબ, લોક જનશક્તિ પાર્ટી (રામવિલાસ)ના અધ્યક્ષ ચિરાગ પાસવાનના પક્ષમાંથી ત્રણ મંત્રીઓને સ્થાન મળી શકે છે. આ ઉપરાંત, જીતન રામ માંઝી અને ઉપેન્દ્ર કુશવાહાની પાર્ટીઓમાંથી પણ એક-એક મંત્રીને મંત્રીમંડળમાં સામેલ કરવાની શક્યતા છે. આ નિર્ણય દ્વારા NDA નેતૃત્વ રાજ્યની જનતાને સ્પષ્ટ સંદેશ આપવા માંગે છે કે નવા શાસનમાં તમામ સહયોગી દળોને ઉચિત પ્રતિનિધિત્વ આપવામાં આવ્યું છે અને આ ગઠબંધન સંપૂર્ણપણે એકજૂથ છે. આ જ સંદેશને મજબૂત કરવા માટે ભાજપે દિલીપ જયસ્વાલ અને સમ્રાટ ચૌધરીને મહત્વની જવાબદારીઓ સોંપી છે.
