લોકસભામાં વિપક્ષના નેતા અને કોંગ્રેસના સાંસદ રાહુલ ગાંધીએ સોમવાર, 12 ઓક્ટોબર, 2026ના રોજ સુપ્રીમ કોર્ટ સુધી કૂચ કરીને ભારતના મુખ્ય ન્યાયાધીશ (CJI)ને આવેદનપત્ર સોંપવાની જાહેરાત કરી છે. તેમણે દેશભરના લોકોને આ કૂચમાં જોડાવા અપીલ કરતાં કહ્યું કે આપણે સોમવારે ભારતીય નાગરિક તરીકે સુપ્રીમ કોર્ટ સુધી કૂચ કરીશું. પક્ષ, સ્ત્રી-પુરુષ, જાતિ, સમુદાય અને રાજ્યના ભેદથી ઉપર ઊઠીને સૌ સાથે ચાલીશું.
રાહુલ ગાંધીએ દેશના તમામ રાજકીય પક્ષોના નેતાઓ, નાગરિક સમાજના સભ્યો અને સામાન્ય લોકોને કોંગ્રેસની આ કૂચમાં જોડાવા અપીલ કરી છે. તેમણે કહ્યું કે જે લોકો બંધારણમાં વિશ્વાસ રાખે છે અને તેની સાથે ઊભા છે, તેઓ સૌ આવતીકાલે અમારી સાથે ચાલશે.
તેમણે વધુમાં કહ્યું કે આપણે કોઈ રાજકીય પક્ષના સભ્ય તરીકે, કોઈ વ્યક્તિ તરીકે, સ્ત્રી કે પુરુષ તરીકે અથવા અલગ-અલગ રાજ્યોના રહેવાસી તરીકે નહીં, પરંતુ ભારતના નાગરિક તરીકે સુપ્રીમ કોર્ટ સુધી કૂચ કરીશું. જાતિ અને વર્ગના ભેદભાવથી ઉપર ઊઠીને સૌએ એકસાથે આવવું જોઈએ.
https://x.com/RahulGandhi/status/2109271519373545893?ref_src=twsrc%5Etfw%7Ctwcamp%5Etweetembed%7Ctwterm%5E2109271519373545893%7Ctwgr%5E%7Ctwcon%5Es1_c10&ref_url=
રાહુલ ગાંધીએ શું અપીલ કરી?
રાષ્ટ્રીય રાજધાની દિલ્હીમાં કોકરોચ જનતા પાર્ટી (CJP)ના વિરોધ પ્રદર્શન વચ્ચે રાહુલ ગાંધીએ આ મોટી જાહેરાત કરી છે. તેમણે રવિવાર, 11 ઓક્ટોબર, 2026ના રોજ સોશિયલ મીડિયા પ્લેટફોર્મ X પર એક વીડિયો પોસ્ટ કર્યો હતો.
આ વીડિયોમાં રાહુલ ગાંધીએ કહ્યું, “તમે ગઈકાલે જોયું કે દેશના યુવાનો શાંતિપૂર્ણ વિરોધ કરવા માટે દિલ્હીના રસ્તાઓ પર ઊતર્યા હતા. તેમના મનમાં નફરત કે ગુસ્સો નહોતો, પરંતુ પ્રેમ હતો. તેમ છતાં પોલીસકર્મીઓ અને ભાજપના ગુંડાઓ, બંનેએ તેમને માર માર્યો. આપણે આવું ભારત નથી ઇચ્છતા.”
તેમણે વધુમાં કહ્યું, “આવતીકાલે આપણે ભારતીય નાગરિક તરીકે સુપ્રીમ કોર્ટ સુધી કૂચ કરીશું. પક્ષ, સ્ત્રી-પુરુષ, જાતિ, સમુદાય અને રાજ્યના દરેક ભેદથી ઉપર ઊઠીને સૌ સાથે ચાલીશું. દેશના યુવાનો, તમામ વિપક્ષી પક્ષો, નાગરિક સમાજ અને લોકશાહીમાં વિશ્વાસ રાખતા તથા તેના માટે ઊભા રહેવા ઇચ્છતા દરેક વ્યક્તિને મારી અપીલ છે કે અમારી સાથે જોડાઓ. જ્યાં સુધી તમે દેશના બંધારણ સાથે જોડાયેલા છો અને તેને બચાવવા ઇચ્છો છો, ત્યાં સુધી આપણે સૌ સાથે ચાલીશું.”
