કોંગ્રેસના નેતા અને લોકસભામાં વિરોધ પક્ષના નેતા રાહુલ ગાંધીએ 'સત્યાગ્રહ' નામનું ડિજિટલ પોર્ટલ શરૂ કર્યું છે. આ પહેલ દ્વારા દેશભરમાં પોતાના અધિકારો માટે સંઘર્ષ કરી રહેલા અને વિવિધ મુદ્દાઓ ઉઠાવી રહેલા લોકોની કહાનીઓને એકત્રિત કરવાનો પ્રયાસ કરવામાં આવ્યો છે.
‘સત્યાગ્રહ’ પોર્ટલ શરૂ કરવાનો હેતુ શું ?
આ પહેલનો ઉદ્દેશ્ય દેશભરમાં ચાલી રહેલા તમામ આંદોલનોને એક જ નકશા પર એકત્રિત કરવાનો છે. રાહુલ ગાંધીએ નોંધ્યું હતું કે ' ઝેન ઝી ' (Gen Z), વિદ્યાર્થીઓ, ખેડૂતો, આદિવાસીઓ, દલિતો અને મહિલાઓ પોતપોતાની વાર્તાઓ સાથે અલગ-અલગ રીતે સંઘર્ષ કરી રહ્યા છે, પરંતુ ઘણીવાર એકલો અવાજ દબાઈ જાય છે. તેમણે ઉમેર્યું, "દેશભરમાં લોકો અન્યાય વિરુદ્ધ અવાજ ઉઠાવી રહ્યા છે. વિરોધ પક્ષના નેતા તરીકે, તમારી લડાઈ એ મારી લડાઈ છે. હવે એક નવા 'સત્યાગ્રહ'નો સમય આવી ગયો છે. તમે જે મુદ્દાઓ માટે સંઘર્ષ કરી રહ્યા છો તે મને જણાવો. હું તમારી વાત સાંભળી રહ્યો છું."
તેમણે બાપુના એ ઉપદેશને યાદ કર્યો કે સત્ય એ સૌથી મોટું શસ્ત્ર છે, પરંતુ સત્ય માટે એકજૂથ થઈને ઊભા રહેવું એ તેનાથી પણ વધુ શક્તિશાળી છે. તેમણે અન્યાય સામે લડી રહેલા લોકોને પોતાની વાત બે મિનિટમાં રજૂ કરવા આહ્વાન કર્યું. આ વાર્તા નકશા પર દેખાશે, જેનાથી લોકોને ખ્યાલ આવશે કે અન્ય કેટલા લોકો સમાન સંઘર્ષમાં જોડાયેલા છે. રાહુલ ગાંધીએ સંસદમાં, રસ્તાઓ પર અને પત્રવ્યવહાર દ્વારા એકતા દર્શાવવાની અને સમર્થન આપવાની ખાતરી આપી. rahulgandhi.in/satyagraha લિંકની મુલાકાત લો.
https://twitter.com/RahulGandhi/status/2106246262039388169
રાહુલ ગાંધીએ કહ્યું, "સમગ્ર દેશમાં સત્યને દબાવવામાં આવી રહ્યું છે. દેશના વિવિધ ભાગોમાં અલગ-અલગ આંદોલનો થઈ રહ્યા છે. કેટલાક જમીનના અધિકારો માટે, તો કેટલાક મહિલાઓના અધિકારો માટે; કેટલાક દલિતો અને ઓબીસી (OBC)ના અધિકારો માટે, અને અન્ય શિક્ષણ તથા પરીક્ષાઓને લગતા મુદ્દાઓ માટે. અમે આ આંદોલનોને સંગઠિત કરવામાં અને તેમને એક મંચ પર લાવવામાં મદદ કરવા માંગીએ છીએ, તેમજ તમે જે મુદ્દાઓ માટે લડી રહ્યા છો તેના ઉકેલ માટે અમે કેવી રીતે સહાય કરી શકીએ તે અંગે તમારી સાથે મળીને કામ કરવા માંગીએ છીએ."