Ladakh News: સોનમ વાંગચુકને લાગ્યો ઝાટકો, લદ્દાખ વહીવટીતંત્રે કેમ લીધો આ નિર્ણય, ઉભા થયા પ્રશ્નો?

લદ્દાખ વહીવટીતંત્રે ફ્યાંગ ગામમાં હિમાલયન ઇન્સ્ટિટ્યૂટ ઓફ અલ્ટરનેટિવ લર્નિંગને આપવામાં આવેલી 1076 કનાલથી વધુ જમીનની ફાળવણી રદ્દ કરી છે. આ સંસ્થાના સ્થાપક પર્યાવરણવાદી સોનમ વાંગચુક છે. વહીવટીતંત્રે સ્પષ્ટતા કરી કે સોનમે જમીન ફાળવણી સંબંધિત ઔપચારિકતાઓ પૂર્ણ કરી નથી કે જે કાર્ય માટે તેને ફાળવવામાં આવી હતી. તેના માટે જમીનનો ઉપયોગ કર્યો નથી.

સામાજિક, રાજકીય, આર્થિક હિત માટે આંદોલન

સોનમ વાંગચુકે તેને રાજ્યમાં રાજ્યનો દરજ્જો અને બંધારણની છઠ્ઠી અનુસૂચિના વિસ્તરણ માટેની લોકોની માંગને દબાવવાનો દૂષિત પ્રયાસ ગણાવ્યો છે. તેમણે કહ્યું હતુ કે આ ફાળવણી રદ કરવામાં આવી છે. કારણ કે તેઓ કેન્દ્ર સરકારની લદ્દાખ વિરોધી નીતિઓનો વિરોધ કરે છે. તે જ સમયે, લેહ એપેક્સ બોડી અને કારગિલ ડેમોક્રેટિક એલાયન્સે આ નિર્ણયની નિંદા કરી હતી. સોનમ વાંગચુક છેલ્લા છ વર્ષથી લદ્દાખના પર્યાવરણના રક્ષણ અને લદ્દાખવાસીઓના સામાજિક, રાજકીય, આર્થિક હિત માટે અવાજ ઉઠાવી રહ્યા છે. લદ્દાખ વહીવટીતંત્રે 2018માં સોનમને ફયાંગ ગામમાં તેમની સંસ્થા માટે જમીન ફાળવી હતી. લેહ જિલ્લાના ડેપ્યુટી કમિશનર રોમિલ સિંહ ડોંકે 21 ઓગસ્ટના રોજ એક આદેશ જારી કરીને હિમાલયન ઇન્સ્ટિટ્યૂટ ઓફ અલ્ટરનેટિવ લર્નિંગને ફાળવવામાં આવેલી જમીનની ફાળવણી રદ કરી હતી. તેમણે કહ્યું કે આ જમીનને સરકારી જમીન ગણાવીને, લેહ ઓટોનોમસ હિલ ડેવલપમેન્ટ કાઉન્સિલ અને તહેસીલદાર લેહને ગેરકાયદેસર બાંધકામો અને અતિક્રમણો દૂર કરવા માટે કહેવામાં આવ્યું છે.

400થી વધુ વિદ્યાર્થીઓને મળી ફેલોશિપ

HIALના CEO અને સહ-સ્થાપક ગીતાંજલી એંગ્મોએ જણાવ્યું હતું કે, સંસ્થાની સ્થાપના 2017-18માં થઈ હતી અને 22 ઓગસ્ટના રોજ એક નોટિસ મળી હતી કે જમીન ફાળવણી ત્રણ મુદ્દાઓ પર રદ કરવામાં આવી છે. જે પાયાવિહોણા છે. છેલ્લા પાંચ વર્ષમાં, 400થી વધુ વિદ્યાર્થીઓએ અમારી સંસ્થામાં અભ્યાસક્રમો અને ફેલોશિપ પૂર્ણ કરી છે. તે એક વૈકલ્પિક યુનિવર્સિટી છે અને તેને UGC નોંધણીની જરૂર નથી. અમે 16 માર્ચ, 2022 ના રોજ UGCને અરજી કરી હતી. દરમિયાન, સોનમ વાંગચુકે જણાવ્યું હતું કે, જિલ્લા નાયબ કમિશનરે LAHDCને વિશ્વાસમાં લીધા વિના ફાળવણી રદ કરી છે.