સુપ્રીમ કોર્ટના કોલેજિયમે સોમવાર, 28 સપ્ટેમ્બર 2026ના રોજ દેશની સર્વોચ્ચ અદાલતમાં જજ તરીકે નિમણૂક માટે 3 હાઇકોર્ટના મુખ્ય ન્યાયાધીશોના નામોની ભલામણ કરી છે. આ ભલામણમાં ગુજરાત હાઇકોર્ટના મુખ્ય ન્યાયાધીશ જસ્ટિસ સુનિતા અગ્રવાલ, દિલ્હી હાઇકોર્ટના મુખ્ય ન્યાયાધીશ જસ્ટિસ દેવેન્દ્ર કુમાર ઉપાધ્યાય અને તેલંગાણા હાઇકોર્ટના મુખ્ય ન્યાયાધીશ જસ્ટિસ અપારેશ કુમાર સિંહનો સમાવેશ થાય છે.
ગુજરાતના મુખ્ય ન્યાયાધીશ સુનિતા અગ્રવાલનું નામ આગળ
જસ્ટિસ સુનિતા અગ્રવાલ મૂળ અલ્હાબાદ હાઇકોર્ટ સાથે જોડાયેલા છે અને જુલાઈ 2023થી ગુજરાત હાઇકોર્ટના મુખ્ય ન્યાયાધીશ તરીકે કાર્યરત છે. તેમણે 1989માં અવધ યુનિવર્સિટીમાંથી કાયદાનો અભ્યાસ પૂર્ણ કર્યો હતો અને ડિસેમ્બર 1990થી વકીલાત શરૂ કરી હતી. નવેમ્બર 2011માં તેમની હાઇકોર્ટના જજ તરીકે નિમણૂક થઈ હતી. સુપ્રીમ કોર્ટમાં તેમની નિમણૂક થાય તો તેઓ એપ્રિલ 2031માં નિવૃત્ત થશે.
દિલ્હી હાઇકોર્ટના જસ્ટિસ ઉપાધ્યાય પણ યાદીમાં
દિલ્હી હાઇકોર્ટના મુખ્ય ન્યાયાધીશ જસ્ટિસ દેવેન્દ્ર કુમાર ઉપાધ્યાયનું નામ પણ સુપ્રીમ કોર્ટ માટે મોકલવામાં આવ્યું છે. તેમણે લખનૌ યુનિવર્સિટીમાંથી કાયદાનો અભ્યાસ કર્યો અને મે 1991માં વકીલ તરીકે નોંધણી કરાવી હતી. મે 2007થી નવેમ્બર 2011 સુધી તેઓ ઉત્તર પ્રદેશ સરકારના મુખ્ય સ્થાયી વકીલ રહ્યા હતા. ત્યારબાદ તેઓ હાઇકોર્ટના જજ બન્યા અને જુલાઈ 2023માં બોમ્બે હાઇકોર્ટના મુખ્ય ન્યાયાધીશ બન્યા. બાદમાં તેમનું દિલ્હી હાઇકોર્ટમાં મુખ્ય ન્યાયાધીશ તરીકે સ્થાનાંતરણ થયું.
અપારેશ કુમાર સિંહનું નામ પણ આગળ
તેલંગાણા હાઇકોર્ટના મુખ્ય ન્યાયાધીશ જસ્ટિસ અપારેશ કુમાર સિંહ પણ સુપ્રીમ કોર્ટ માટે ભલામણ કરાયેલા 3 નામોમાં સામેલ છે. તેમણે દિલ્હી યુનિવર્સિટીમાંથી કાયદાનો અભ્યાસ કર્યો અને 1990માં વકીલ તરીકે નોંધણી કરાવી હતી. શરૂઆતમાં પટણા હાઇકોર્ટ અને ત્યારબાદ ઝારખંડ હાઇકોર્ટમાં વકીલાત કરી હતી. 2012માં તેઓ ઝારખંડ હાઇકોર્ટના જજ બન્યા હતા. તેઓ 20 ડિસેમ્બર 2022થી 19 ફેબ્રુઆરી 2023 સુધી ઝારખંડ હાઇકોર્ટના કાર્યકારી મુખ્ય ન્યાયાધીશ રહ્યા હતા. ત્યારબાદ ત્રિપુરા હાઇકોર્ટના મુખ્ય ન્યાયાધીશ તરીકે નિમણૂક થઈ અને 17 એપ્રિલ 2023ના રોજ શપથ લીધા હતા. બાદમાં તેમનું તેલંગાણા હાઇકોર્ટમાં સ્થાનાંતરણ થયું અને 19 જુલાઈ 2025ના રોજ તેમણે મુખ્ય ન્યાયાધીશ તરીકે શપથ લીધા હતા.
હજુ અંતિમ નિમણૂક બાકી
કોલેજિયમની ભલામણ બાદ હવે સુપ્રીમ કોર્ટના જજ તરીકેની નિમણૂક માટેની સ્થાપિત પ્રક્રિયા આગળ વધશે. એટલે હાલ ત્રણેય જજોની સુપ્રીમ કોર્ટમાં નિમણૂકની માત્ર ભલામણ થઈ છે, અંતિમ નિમણૂક હજુ પ્રક્રિયાધીન છે. ત્રણેય ભલામણો મંજૂર થાય તો સુપ્રીમ કોર્ટમાં કાર્યરત જજોની સંખ્યા 37 થઈ શકે છે, જ્યારે મંજૂર સંખ્યા 38 છે.
આ પણ વાંચો : Crime : સોશિયલ મીડિયા ઈન્ફ્લુએન્સર નિધિના કાનમાં બ્લૂટૂથ અને સતત એક વ્યક્તિ સાથે સંપર્ક, ચોંકાવનારો ખુલાસો
