કોર્ટે જણાવ્યું કે ધર્મ પરિવર્તન પછી SCનો દરજ્જો આપમેળે સમાપ્ત થઈ જાય છે અને આવા વ્યક્તિને SC/ST અત્યાચાર નિવારણ કાયદાનું સંરક્ષણ પણ મળશે નહીં. કોર્ટે વધુમાં સ્પષ્ટ કર્યું કે ખ્રિસ્તી બનેલા વ્યક્તિને SC/ST એક્ટનો લાભ નહીં મળે.
હકીકતમાં, આંધ્ર પ્રદેશના રહેવાસી પાદરી ચિન્થાડા આનંદે SC/ST એક્ટ હેઠળ કેસ દાખલ કર્યો હતો. તેમણે આરોપ લગાવ્યો હતો કે કેટલાક લોકોએ તેમને જાતિના નામે ગાળો આપી, મારપીટ કરી અને જાનથી મારી નાખવાની ધમકી આપી. જ્યારે આરોપી પક્ષે દલીલ કરી હતી કે આનંદ ખ્રિસ્તી ધર્મ અપનાવીને પાદરી બની ગયા છે, તેથી તેમને SCનો દરજ્જો મળવો જોઈએ નહીં.
આંધ્ર પ્રદેશ હાઇકોર્ટે આ દલીલને યોગ્ય ગણાવીને FIR રદ કરી દીધી. હાઇકોર્ટે કહ્યું કે ખ્રિસ્તી ધર્મ અપનાવીને સક્રિય રીતે તેનું પાલન કરનાર વ્યક્તિને SCનો દરજ્જો યથાવત રહેતો નથી, ભલે તેની પાસે જૂનું SC પ્રમાણપત્ર હોય.
આંધ્ર પ્રદેશ હાઇકોર્ટના આ નિર્ણયને આનંદે સુપ્રીમ કોર્ટમાં પડકાર્યો હતો. સુનાવણી દરમિયાન ન્યાયમૂર્તિ પી.કે. મિશ્રા અને એન.વી. અંજરિયાની બેન્ચે હાઇકોર્ટના નિર્ણયને યોગ્ય ગણાવ્યો. કોર્ટે કહ્યું કે ખ્રિસ્તી ધર્મ અપનાવીને સક્રિય રીતે તેનું પાલન કરનાર વ્યક્તિને અનુસૂચિત જાતિના સભ્ય તરીકે માન્યતા આપી શકાય નહીં.
સુપ્રીમ કોર્ટે નોંધ્યું કે આનંદ છેલ્લા દસ વર્ષથી રવિવારની પ્રાર્થનાઓનું આયોજન કરી રહ્યા હતા અને ઘટનાના સમયે પણ તેઓ ખ્રિસ્તી ધર્મનું પાલન કરી રહ્યા હતા, જેના કારણે તેમનો SC દરજ્જો આપમેળે સમાપ્ત થઈ ગયો હતો.
કોર્ટે હાઇકોર્ટના નિર્ણયને સંપૂર્ણ રીતે યોગ્ય ગણાવતા જણાવ્યું કે અરજદારે ક્યાંય દાવો કર્યો નથી કે તેણે ફરીથી પોતાના મૂળ ધર્મમાં પરત ફર્યો છે અથવા તેને ફરીથી પોતાની જાતિમાં સ્વીકારવામાં આવ્યો છે. આથી સાબિત થાય છે કે તે લાંબા સમયથી ખ્રિસ્તી ધર્મનું પાલન કરી રહ્યો હતો અને પાદરી તરીકે કાર્યરત હતો, જે ગામોમાં નિયમિત રીતે રવિવારની પ્રાર્થનાઓ યોજતો હતો.
આ પણ વાંચો: Weather Update : દિવસ સામાન્ય તો રાત્રે ઠંડી, રાજધાનીમાં માર્ચમાં નહી પડે ભયંકર ગરમી