આવતીકાલે 1 જૂન,2026 થી દેશમાં અનેક નાણાકીય અને વહીવટી નિયમોમાં મોટા ફેરફારો થવા જઈ રહ્યા છે. આ ફેરફારો સીધી રીતે સામાન્ય નાગરિકોના માસિક બજેટ, ડિજિટલ લેવડદેવડ, બેંકિંગ આદતો અને મુસાફરી પર અસર કરશે. કોઈપણ પ્રકારના વધારાના શુલ્ક કે મુશ્કેલીથી બચવા માટે આ નવા નિયમો વિશે અગાઉથી જાણકારી રાખવી અત્યંત આવશ્યક છે.
નેશનલ પેમેન્ટ્સ કોર્પોરેશન ઓફ ઈન્ડિયા (NPCI) હવે UPI દ્વારા પૈસા મોકલવા માટે 'નામ ચકાસણી' (Name Verification) ફરજિયાત કરી રહ્યું છે. હવે યુઝર દ્વારા જે નામ નક્કી કરવામાં આવ્યું હોય તેને બદલે, જે વ્યક્તિને પૈસા મોકલવામાં આવે છે તેના બેંક ખાતામાં નોંધાયેલું સાચું નામ જ જોવા મળશે. વધુમાં, નિર્ધારિત મર્યાદા પૂરી થયા બાદ ATM ટ્રાન્ઝેક્શન પર પ્રતિ વ્યવહાર ₹૨૩ સુધીનો ચાર્જ વસૂલવામાં આવી શકે છે, જ્યારે HDFC જેવી બેંકોએ સિક્કા જમા કરાવવા પર પણ નવા શુલ્ક લાગુ કર્યા છે.
દર મહિનાની જેમ ગેસ કંપનીઓ ૧ જૂનના રોજ કોમર્શિયલ ગેસ સિલિન્ડરના નવા દરો જાહેર કરશે, જેની અસર રેસ્ટોરન્ટ અને અન્ય વ્યવસાયો પર પડી શકે છે. PAN કાર્ડ અંગેના નિયમોમાં પણ રાહત આપવામાં આવી છે; હવે ₹૫૦,૦૦૦ થી વધુ રોકડ જમા કરાવવા પર PAN આપવો ફરજિયાત નથી. જોકે, મિલકતના વ્યવહારો માટે મર્યાદા ₹૨૦ લાખ સુધી વધારવામાં આવી છે, પરંતુ વાર્ષિક ₹૧૦ લાખથી વધુ રોકડ ઉપાડ અને ₹૪૫ લાખથી વધુની પ્રોપર્ટી માટે PAN હવે પણ અનિવાર્ય છે. PAN ન હોય તો હવે જૂના ફોર્મ-૬૦ ને બદલે નવું ફોર્મ-૯૭ ભરવું પડશે.
ભારતીય રેલવે દ્વારા ટ્રેક અપગ્રેડેશન અને મેન્ટેનન્સના કામને કારણે જૂન મહિનામાં દેશભરમાં લગભગ ૭૭ ટ્રેનો રદ અથવા ડાયવર્ટ કરવામાં આવશે. ગુજરાત, મહારાષ્ટ્ર અને મધ્યપ્રદેશ જેવા રાજ્યોમાંથી પસાર થતી ઘણી સુપરફાસ્ટ ટ્રેનોના સમયમાં ફેરફાર થવાની શક્યતા છે. બીજી તરફ, સોલાર ક્ષેત્રમાં પણ કડક નિયમો (ALMM) લાગુ થઈ રહ્યા છે. હવે સરકારી યોજનાઓ હેઠળ માત્ર માન્યતા પ્રાપ્ત ઘરેલું સોલાર પેનલનો જ ઉપયોગ કરી શકાશે, જેનાથી સોલાર પેનલના ભાવમાં થોડો વધારો જોવા મળી શકે છે.
આ ફેરફારોનો મુખ્ય ઉદ્દેશ્ય ડિજિટલ સુરક્ષા વધારવી અને દેશી ઉત્પાદનને પ્રોત્સાહન આપવાનો છે. નાગરિકોને સલાહ આપવામાં આવે છે કે તેઓ પોતાની બેંકિંગ એપ્સ અને રેલવેના સમયપત્રકને અપડેટ રાખે જેથી કોઈ પણ પ્રકારના આર્થિક કે વ્યવહારુ નુકસાનથી બચી શકાય.
આ પણ વાંચોઃ France : પીએસજીની જીત બની આફત, પેરિસમાં ઉજવણીએ હિંસક રૂપ ધારણ કર્યુ, 400ની ધરપકડ