ઉજ્જૈનના વિશ્વ પ્રસિદ્ધ શ્રી મહાકાલેશ્વર મંદિરમાં આ વર્ષે શ્રાવણ માસ દરમિયાન ભક્તોની ભારે ભીડ જોવા મળી હતી. માત્ર 30 દિવસના શ્રાવણ માસમાં અંદાજે 1 કરોડ 57 લાખ 210 શ્રદ્ધાળુઓએ બાબા મહાકાલના દર્શન કરી આશીર્વાદ મેળવ્યા હતા. મંદિર સમિતિના જણાવ્યા અનુસાર, આ દરમિયાન શીઘ્ર દર્શન ટિકિટ અને લાડુ પ્રસાદીના વેચાણથી પણ કરોડો રૂપિયાની આવક થઈ છે.
શ્રી મહાકાલેશ્વર મંદિર પ્રબંધ સમિતિના સહાયકના જણાવ્યા અનુસાર, શ્રાવણ માસ દરમિયાન ભક્તોની સુવિધા માટે ખાસ વ્યવસ્થા કરવામાં આવી હતી. કાવડિયાઓ માટે જળ અર્પણ કરવાની અલગ વ્યવસ્થા ઉપરાંત સરળ દર્શન, નિઃશુલ્ક ભોજન પ્રસાદી અને જરૂરિયાતમંદ ભક્તો માટે નિઃશુલ્ક ચરણ પાદુકાની સુવિધા આપવામાં આવી હતી.
1.13 કરોડ ભક્તોએ સીધા મંદિર પહોંચીને દર્શન કર્યા
મંદિર સમિતિના આંકડા મુજબ, શ્રાવણ દરમિયાન આશરે 1 કરોડ 13 લાખ 25 હજાર 210 ભક્તોએ સીધા મહાકાલેશ્વર મંદિરે પહોંચી દર્શન કર્યા હતા. જ્યારે બાબા મહાકાલની સવારી અને ભગવાન નાગચંદ્રેશ્વરના દર્શન માટે આશરે 43 લાખ 75 હજાર ભક્તો પહોંચ્યા હતા. આ રીતે કુલ સંખ્યા 1 કરોડ 57 લાખ 210 સુધી પહોંચી હતી.
ભક્તોની સંખ્યામાં વધારા સાથે મંદિરની આવકમાં પણ વધારો થયો હતો. શીઘ્ર દર્શન માટે લગભગ 5 લાખ 76 હજાર 370 ટિકિટનું વેચાણ થયું, જેના થકી આશરે 14.47 કરોડ રૂપિયાની આવક થઈ. જ્યારે લગભગ 2,215.939 ક્વિન્ટલ લાડુ પ્રસાદીના વેચાણથી આશરે 10.49 કરોડ રૂપિયાની આવક થઈ હતી.
5 લાખથી વધુ કાવડિયાઓ પહોંચ્યા
શ્રાવણ દરમિયાન 5 લાખથી વધુ કાવડિયાઓએ બાબા મહાકાલને જળ અર્પણ કર્યું હતું. મંદિરના અન્નક્ષેત્રમાં આશરે 3 લાખ 47 હજાર 912 ભક્તોએ નિઃશુલ્ક ભોજન પ્રસાદી લીધી હતી. ચરણ પાદુકાની નવી વ્યવસ્થાનો લાભ 10 હજારથી વધુ ભક્તોએ લીધો હતો. ગત વર્ષોની સરખામણીમાં આ વર્ષે શ્રાવણમાં જ 1.57 કરોડથી વધુ ભક્તો પહોંચતા મહાકાલ મંદિર ખાતે શ્રદ્ધાળુઓની હાજરીનો નવો રેકોર્ડ બન્યો છે.
આ પણ વાંચો : Uttarakhand Disaster Threat: નેપાળ જેવી તબાહીનો ખતરો ઉત્તરાખંડ પર, જાણો કટોકટીની તૈયારીઓ
