ઉત્તર પ્રદેશના આઝમગઢની ડિવિઝનલ જેલમાં ઘોર બેદરકારીનો એક કિસ્સો પ્રકાશમાં આવ્યો છે.જેલ પ્રશાસનની બેદરકારીનો લાભ લઈને એક કેદીએ જેલની કેનેરા બેંકની ચેકબુક ગાયબ કરી દીધી. છૂટ્યા પછી, તેણે જેલના સત્તાવાર ખાતામાંથી આશરે રૂ30 લાખ ઉપાડવા માટે આ જ ચેકબુકનો ઉપયોગ કર્યો.
પત્નીની હત્યા માટે જેલમાં બંધ
અહેવાલો અનુસાર, બિલરિયાગંજ પોલીસ સ્ટેશનના જમુઆ શાહગઢ ગામનો રહેવાસી રામજીત યાદવ ઉર્ફે સંજય,તેની પત્નીની હત્યા માટે જેલમાં બંધ હતો. રામજીતને 24 ફેબ્રુઆરી 2023 ના રોજ જેલમાં બંધ કરવામાં આવ્યો હતો અને 20મે2024 ના રોજ જામીન પર મુક્ત કરવામાં આવ્યો હતો. તેની મુક્તિ દરમિયાન,તેણે જેલના સત્તાવાર ખાતાની કેનેરા બેંક શાખાની ચેકબુક ચોરી લીધી હતી, જે જેલ અધિક્ષકના નામે સંચાલિત છે.
અનેક કિસ્સાઓમાં રૂ30 લાખ ઉપાડ્યા
21 મે 2024ના રોજ તેની મુક્તિના બીજા દિવસે, તેણે પહેલી વાર રૂ10,000 ઉપાડ્યા. ત્યારબાદ તેણે 22 મેના રોજ બીજા રૂ50,000 અને ચાર દિવસ પછી બીજા રૂ1.40 લાખ ઉપાડ્યા. તેણે બનાવટી સહીઓનો ઉપયોગ કરીને બેંકમાંથી પૈસા ઉપાડવાનું ચાલુ રાખ્યું, પરંતુ જેલ વહીવટીતંત્ર અજાણ રહ્યું. જેલ અધિક્ષક આદિત્ય કુમાર સિંહને આ બાબતની જાણ થઈ જ્યારે તેમણે 22 સપ્ટેમ્બર,2025ના રોજ બીજા રૂ260,000 ઉપાડ્યા.
ચાર આરોપીઓ વિરુદ્ધ પોલીસ ફરિયાદ નોંધાઈ
ત્યાર બાદ જેલ અધિક્ષકે વરિષ્ઠ લેખા પ્રભારી મુશીર અહમદ સાથે પૂછપરછ કરી,તો તેણે પૈસા ઉપાડ્યા હોવાની ના પાડી.બેન્કના સ્ટેટમેન્ટ કાઢતા ખુલાસો થયો કે રામજીત યાદવ ખુદને જેલનો કોન્ટ્રાક્ટર ગણાવીને જેલ અધિક્ષકની નકલી સહીઓ કરી ખાતામાંથી પૈસા ઉપાડતો રહ્યો. જેલ અધિક્ષકે તાત્કાલિક કાર્યવાહી કરતા કોતવાલી આઝમગઢમાં ચાર આરોપીઓ રામજીત યાદવ,શિવ શંકર,વરિષ્ઠ સહાયક મુશીર અહમદ અને ચોકીદાર અવધેશ કુમાર પાંડે વિરુદ્ધ કેસ દાખલ કર્યો છે. હાલમાં પોલીસે ફરિયાદ નોંધી લીધી છે. તો વળી ચારેયની ધરપકડ કરી પૂછપરછ ચાલી રહી છે.
