Uttarpradesh : ફરુખાબાદના કોચિંગ સેન્ટરમાં મોટો વિસ્ફોટ, 2 લોકોના મોત

ઉત્તર પ્રદેશના ફરુખાબાદ જિલ્લામાં શનિવારે એક મોટી દુર્ઘટના સર્જાઈ છે. શહેરના એક કોચિંગ સેન્ટરમાં અજાણ્યા કારણોસર ભયાનક વિસ્ફોટ થયો છે, જેમાં 2 વિદ્યાર્થીઓના ઘટનાસ્થળે જ મોત થયા છે અને 6 અન્ય લોકો ગંભીર રીતે ઘાયલ થયા છે. વિસ્ફોટ એટલો શક્તિશાળી હતો કે તેનાથી આસપાસનો વિસ્તાર હચમચી ગયો. પોલીસ હાલમાં ઘટનાની તપાસ કરી રહી છે.

વિસ્ફોટના અવાજથી નજીકના રહેવાસીઓ ગભરાઈ ગયા

ઘટનાની માહિતી મળતાં જિલ્લા મેજિસ્ટ્રેટ (DM) અને પોલીસ અધિક્ષક (SP) ઘટનાસ્થળે પહોંચ્યા અને ત્યાં હાજર પોલીસ ટીમ પાસેથી ઘટના વિશે પૂછપરછ કરી છે. ઉલ્લેખનીય છે કે કાદરી ગેટ પોલીસ સ્ટેશન વિસ્તારમાં સતનપુર મંડી રોડ પર આ કોચિંગ સેન્ટર આવેલું છે. શનિવારે સાંજે કોચિંગ સેન્ટરમાં અચાનક વિસ્ફોટ થયો, જેનાથી તે ધુમાડાથી ભરાઈ ગયું. વિસ્ફોટના અવાજથી નજીકના રહેવાસીઓ ગભરાઈ ગયા. લોકો સેન્ટર પર દોડી આવ્યા અને કેટલાક વિદ્યાર્થીઓને ઘાયલ હાલતમાં પડેલા જોયા. તેમણે ઘટના અંગે કાદરી ગેટ પોલીસ સ્ટેશનને જાણ કરી છે.

ઘાયલ વિદ્યાર્થીઓને સૈફઈ મેડિકલ કોલેજમાં રિફર કરવામાં આવ્યા

માહિતી મળતાં જ પોલીસની ટીમ ઘટનાસ્થળે પહોંચી ગઈ. પોલીસે 8 ઘાયલ વિદ્યાર્થીઓને સારવાર માટે જિલ્લા હોસ્પિટલમાં દાખલ કર્યા. ડોક્ટરોએ આમાંથી 2 વિદ્યાર્થીઓને મૃત જાહેર કર્યા. અન્ય 6 વિદ્યાર્થીઓને ગંભીર ઈજાઓ માટે સારવાર આપવામાં આવી. આમાંથી કેટલાક વિદ્યાર્થીઓને ગંભીર ઈજાઓ માટે સૈફઈ મેડિકલ કોલેજમાં રિફર કરવામાં આવ્યા હતા. ઈમારતના ભાગો 20 મીટર દૂર સુધી વિખેરાઈ ગયા હતા. વિસ્ફોટનો અવાજ લગભગ 2 કિલોમીટર સુધી સંભળાયો હતો.