Uttar Pradesh : આગ્રામાં મોટો માર્ગ અકસ્માત, 5 લોકોના મોત અને 2 લોકો થયા ઘાયલ

ઉત્તર પ્રદેશના આગ્રામાં એક મોટો માર્ગ અકસ્માત સર્જાયો છે. શુક્રવારે મોડી રાત્રે એક ભયાનક માર્ગ અકસ્માતે સમગ્ર વિસ્તારને હચમચાવી નાખ્યો છે. મળતી માહિતી મુજબ નવા આગ્રાના નાગલા બુધી વિસ્તારમાં એક ઝડપી કારે ઘરની બહાર બેઠેલા લોકોને કચડી નાખ્યા, જેમાં 5 લોકોના મોત થયા અને 2 લોકો ગંભીર રીતે ઘાયલ થયા છે. આ અકસ્માતને લઈને ભારે અફરાતફરી મચી ગઈ છે. સ્થાનિક લોકોએ તાત્કાલિક પોલીસને જાણ કરી અને ઘાયલોને નજીકની હોસ્પિટલમાં સારવાર માટે ખસેડ્યા છે.

કાર ઘરની બહાર બેઠેલા લોકો પર ચડી ગઈ

પ્રત્યક્ષદર્શીઓના જણાવ્યા મુજબ કાર એટલી ઝડપથી ચાલી રહી હતી કે ડ્રાઈવરે કાબુ ગુમાવ્યો અને દિવાલ સાથે અથડાઈ ગઈ, જેના કારણે રસ્તા પર બેઠેલા લોકોને કચડી નાખ્યા, ટક્કર એટલી ગંભીર હતી કે ઘણા લોકો ઘટનાસ્થળે જ મૃત્યુ પામ્યા છે. આ દરમિયાન, મુખ્યમંત્રી યોગી આદિત્યનાથે આ ઘટના પર ઊંડો શોક વ્યક્ત કર્યો છે. તેમણે અધિકારીઓને ઘાયલોને યોગ્ય સારવાર અને શક્ય તમામ સહાય પૂરી પાડવા નિર્દેશ આપ્યો છે.

હાલમાં મૃતકોની ઓળખ કરવાની પ્રક્રિયા ચાલી રહી છે

મૃતક બબલીના ભાઈ પિન્ટુએ ઘટનાસ્થળે જણાવ્યું હતું કે એક પુરપાટ ઝડપે આવી રહેલી કાર ડિવાઈડર સાથે અથડાતા પહેલા બધાને કચડી નાખ્યા. અકસ્માત દરમિયાન, મારી બહેન અને અન્ય ઘણા લોકોનું ઘટનાસ્થળે જ મૃત્યુ થયું છે. ઘટના પછીની તસવીરો પણ સામે આવી છે, જેનાથી દુર્ઘટનાની તીવ્રતાનો ખ્યાલ આવી રહ્યો છે. પોલીસ હાલમાં ઘટનાસ્થળે તૈનાત છે અને પીડિતોના પરિવારોને ન્યાય મળી શકે તે માટે લોકોને શાંત રહેવાની અપીલ કરવામાં આવી છે. મૃતકોની ઓળખ કરવાની પ્રક્રિયા પણ ચાલી રહી છે.