વંદે ભારત એસી ચેર કાર પછી, હવે તેનું સ્લીપર વર્ઝન પણ ટ્રેક પર આવવા માટે તૈયાર છે. વંદે ભારત એસી ફર્સ્ટ ક્લાસ સ્લીપરની પહેલી ઝલકે બધાનું દિલ જીતી લીધું છે. ફર્સ્ટ એસી કમ્પાર્ટમેન્ટની ડિઝાઈન ખરેખર એરલાઈન જેવી લક્ઝરી ફીલ આપે છે. અવાજ-મુક્ત ઈન્ટિરિયર, સેન્સર લાઈટિંગ, દરેક બર્થ પર ચાર્જિંગ પોઈન્ટ અને ઉપરના બર્થ સુધી પહોંચવા માટે સ્ટાઇલિશ સીડી જેવી સુવિધાઓ ટ્રેનને ખરેખર ખાસ બનાવે છે. હવે, ફક્ત તે ટ્રેક પર આવે તેની રાહ જોવાનું બાકી છે.
ભવિષ્યની હાઇ-સ્પીડ લક્ઝરી ટ્રેન
ભવિષ્યની હાઈ-સ્પીડ લક્ઝરી ટ્રેનની ડિઝાઈન રજૂ કરી છે, જે મુસાફરીને વધુ આરામદાયક, શાંત અને સ્ટાઈલિશ બનાવશે. ભારતીય રેલ્વેના ઇતિહાસમાં એક નવો અધ્યાય ઉમેરાયો છે. વંદે ભારત સ્લીપર ટ્રેનની પહેલી ઝલક સામે આવી છે. આંતરરાષ્ટ્રીય રેલ્વે ઈક્વિપમેન્ટ એક્ઝિબિશન (IREE 2025)માં પ્રથમ વખત ફર્સ્ટ એસી સ્લીપર કમ્પાર્ટમેન્ટની ડિઝાઇન કોન્સેપ્ટ રજૂ કરી છે.
જૂન 2026 સુધીમાં પ્રથમ પ્રોટોટાઇપ તૈયાર થશે
KINETના પ્રોજેક્ટ ડિરેક્ટર નિશંક ગર્ગ અને ટ્રેન પ્રોજેક્ટના મુખ્ય ડિઝાઈનર, એવજેની માસ્લોવે આ પ્રસંગે જણાવ્યું હતું કે આ ટ્રેન ભારતીય મુસાફરોને આરામ, ટેકનોલોજી અને વૈભવીતાનો શ્રેષ્ઠ અનુભવ પ્રદાન કરશે. KINET એક ભારતીય કંપની છે જે રેલ વિકાસ નિગમ લિમિટેડ (RVNL) અને અગ્રણી રશિયન રેલ્વે કંપનીઓ વચ્ચે સંયુક્ત સાહસ તરીકે કાર્યરત છે. કંપનીને 120 વંદે ભારત સ્લીપર ટ્રેનો, અથવા 1,920 કોચના ઉત્પાદન અને જાળવણીની જવાબદારી સોંપવામાં આવી છે. તમને જણાવી દઈએ કે જૂન 2026 સુધીમાં પ્રથમ પ્રોટોટાઈપ તૈયાર થશે.
આ ટ્રેન ભારતીય રેલ્વેને નવી ઉંચાઈઓ પર લઈ જશે
મહારાષ્ટ્રના લાતુરમાં કંપનીનો અત્યાધુનિક ઉત્પાદન પ્લાન્ટ આ પ્રોજેક્ટ માટે મુખ્ય કેન્દ્ર છે. હૈદરાબાદમાં એન્જિનિયરિંગ સેન્ટર અને જોધપુરમાં બનાવવામાં આવી રહેલી જાળવણી ડેપો ટ્રેન કામગીરી માટે મજબૂત પાયો પૂરો પાડશે. ભવિષ્યમાં દિલ્હી અને બેંગલુરુમાં પણ નવી સુવિધાઓ ખુલશે. આ ટ્રેન ભારતીય રેલ્વેને નવી ઉંચાઈઓ પર લઈ જશે. આધુનિક ટેકનોલોજી અને અદભુત ડિઝાઈન સાથે આ ટ્રેન ફક્ત મુસાફરીને આરામદાયક બનાવશે નહીં, પરંતુ આંતરરાષ્ટ્રીય સ્તરે ભારતીય રેલ્વેની છબી પણ વધારશે.
