લોકસભામાં વંદે માતરમ બિલ પાસ થયું છે. નોંધનીય છે કે, ગઈકાલે રાજ્યસભામાં આ બિલ પસાર થયું હતું. આજે ધ્વનિમતથી લોકસભામાં પસાર થયું છે. જોકે, લોકસભામાં હોબાળાને કારણે કાર્યવાહી કાલ સુધી સ્થગિત કરવામાં આવી છે.
નોંધનીય છે કે, રાજ્યસભાએ 'રાષ્ટ્રીય સન્માનના અપમાન નિવારણ (સુધારા) બિલ, 2026' પસાર કર્યું છે. આ સુધારો 'વંદે માતરમ'ના અપમાન સંબંધિત જોગવાઈઓને કાનૂની રક્ષણ આપે છે. કાયદાનો ઉદ્દેશ્ય 'વંદે માતરમ'ને રાષ્ટ્રગીત, 'જન ગણ મન' જેવું જ કાનૂની રક્ષણ આપવાનો છે. એકવાર કાયદો અમલમાં આવ્યા પછી, જે કોઈ પણ વ્યક્તિ ઇરાદાપૂર્વક 'વંદે માતરમ'નું અપમાન કરે છે અથવા ગીત ગાવામાં વિક્ષેપ પાડે છે તેને ત્રણ વર્ષ સુધીની જેલ, દંડ અથવા બંને થઈ શકે છે.
સંસદના ચાલી રહેલા ચોમાસુ સત્રના નવમા દિવસે, લોકસભાએ 'વંદે માતરમ બિલ'ને મંજૂરી આપી. આ બિલ અગાઉ 29 જુલાઈના રોજ રાજ્યસભા દ્વારા પસાર કરવામાં આવ્યું હતું. બંને ગૃહોમાં પસાર થયા પછી હવે તેને કાયદો બનવાનો માર્ગ મોકળો થયો છે. બંને ગૃહોમાં પસાર થયા પછી બિલ રાષ્ટ્રપતિને મોકલવામાં આવશે. રાષ્ટ્રપતિ દ્વારા સંમતિ મળ્યા પછી તે કાયદો બનશે. રાષ્ટ્રપતિ દ્વારા સહી કર્યા પછી કાયદો ભારતના ગેઝેટમાં પ્રકાશિત થશે. તે સરકાર દ્વારા નિર્ધારિત તારીખથી સમગ્ર દેશમાં અને નિયુક્ત વિસ્તારોમાં અમલમાં આવશે.
વિપક્ષના હોબાળા વચ્ચે લોકસભામાં બિલ પસાર
વિપક્ષના હોબાળા વચ્ચે 'વંદે માતરમ બિલ' 30 જુલાઈ (ગુરુવાર) ના રોજ પસાર કરવામાં આવ્યું હતું. આ પછી, લોકસભાની કાર્યવાહી બીજા દિવસ, 31 જુલાઈ સુધી સ્થગિત કરવામાં આવી. ગૃહ રાજ્યમંત્રી નિત્યાનંદ રાયે 'રાષ્ટ્રીય સન્માનના અપમાન નિવારણ (સુધારા) બિલ, 2026' લોકસભામાં વિચારણા અને પસાર કરવા માટે રજૂ કર્યું. મતદાન બાદ આ બિલ પસાર કરવામાં આવ્યું. તેમાં 'રાષ્ટ્રીય સન્માનના અપમાન નિવારણ અધિનિયમ, 1971' માં વધુ સુધારો કરવાનો પ્રયાસ કરવામાં આવ્યો હતો.
બિલ પર સરકારનું વલણ
ચોમાસા સત્ર દરમિયાન, કેન્દ્રીય ગૃહમંત્રી અમિત શાહે કેન્દ્ર સરકાર વતી રાજ્યસભામાં આ બિલ રજૂ કર્યું હતું. ચર્ચા પછી, સંસદના ઉપલા ગૃહે બિલ પસાર કર્યું હતું. બિલ પર ચર્ચા દરમિયાન કેન્દ્રીય ગૃહ રાજ્યમંત્રી નિત્યાનંદ રાયે જણાવ્યું હતું કે રાષ્ટ્રીય પ્રતીકોનો આદર એ એક એવો વિષય છે જે રાજકારણથી પર હોવો જોઈએ.
આ પણ વાંચો: Paper Leak મુદ્દે BJPનો AAP વિરુદ્ધ હલ્લાબોલ, પંજાબના શિક્ષણ મંત્રીના રાજીનામાની કરી માગ
