છેલ્લા એક બે દિવસમાં વાયરલ થયેલા એક વીડિયોમાં જોવા મળે છે કે દિલ્હી એરપોર્ટ પર એર ઈન્ડિયાનું એક નેરો બોડી વિમાન પાર્ક હતું.આ દરમિયાન ભારે પવન ફૂંકાયો હતો અને ત્યાં એક સીડી પવનને કારણે લપસી હતી. આ સીડી સીધી જ વિમાન સાથે અથડાઈ હતી. જેના કારણે અફરાતફરી મચી ગઈ હતી અને એર ઈન્ડિયાના વધુ ત્રણ વિમાનો સાધનોની ચપેટમાં આવી ગયા હતાં.
એર ઈન્ડિયાના ત્રણ વિમાનોને ગંભીર નુકસાન
દિલ્હીમાં ઈન્દિરા ગાંધી ઈન્ટરનેશનલ એરપોર્ટ પર ગત રવિવારે સાંજે અચાનક ફૂંકાયેલા ભારે પવનને કારણે એક આશ્ચર્યજનક ઘટના બની હતી. આ ઘટનાનો વીડિયો સોશિયલ મીડિયામાં ભારે વાયરલ થયો છે. ભારે પવનને કારણે એરપોર્ટના રન વે પર મુસાફરોની અવર જવર માટે રાખવામાં આવેલી એક સીડી તથા અન્ય સાધનો જાણે ઉડી રહ્યા હોય તેવું દ્રશ્ય વાયરલ થયેલા વીડિયોમાં જોવા મળી રહ્યું છે. પવનના કારણે આ સાધનો પોતાની જગ્યાએથી આપો આપ ખસવા લાગ્યા હતાં અને ત્યાં પાર્ક કરાયેલા વિમાનો સાથે અથડાયા હતાં. આ ઘટનામાં એર ઈન્ડિયાના ત્રણ વિમાનોને ગંભીર નુકસાન પહોંચ્યું હોવાનું પણ જાણવા મળ્યું છે.
ત્રણેય વિમાનોને ઉડાન સેવામાંથી દૂર કરાયા
આ સમગ્ર ઘટના રવિવારે સાંજે સાડા ચાર વાગ્યાની આસપાસ દિલ્હીના ઈન્દિરા ગાંધી ઈન્ટરનેશનલ એરપોર્ટના ટર્મિનલ 2 નજીક આવેલા પાર્કિગ નંબર બેમાં બની હતી. આ ઘટના બાદ એરપોર્ટ તંત્ર અને એરલાઈન્સની સુરક્ષા વ્યવસ્થાઓ અંગે ગંભીર સવાલો ઉભા થયાં છે. આ ઘટનામાં કેટલું નુકસાન થયું તેનો સત્તાવાર આંકડો હજી સામે આવ્યો નથી. પરંતુ સાવચેતીના ભાગરૂપે અસરગ્રસ્ત ત્રણેય વિમાનોને ઉડાન સેવામાંથી દૂર કરવામાં આવ્યા છે. હાલમાં ટેકનિકલ અને એન્જિનિયરની ટીમો વિમાનને થયેલા નુકસાનનું મૂલ્યાંકન કરી રહી છે.
આ પણ વાંચોઃ Jaipur Demolition: નૂરાની મસ્જિદ જમીનદોસ્ત, 3000 પોલીસકર્મીઓ રહ્યા હાજર
આ પણ વાંચોઃ Jaipur Demolition: નૂરાની મસ્જિદ જમીનદોસ્ત, 3000 પોલીસકર્મીઓ રહ્યા હાજર
