દિલ્હી-NCRમાં હળવાથી મધ્યમ વરસાદ નોંધાયો છે, જ્યારે પર્વતીય વિસ્તારોમાં બરફવર્ષા થવાથી ઠંડીનો પ્રભાવ વધ્યો છે. લોકોના મનમાં સવાલ છે કે શું ફરીથી ઠંડી પરત ફરશે?
અનેક વિસ્તારોમાં વરસાદના કારણે તાપમાનમાં નોંધપાત્ર ઘટાડો
રાષ્ટ્રીય રાજધાની દિલ્હી અને આસપાસના વિસ્તારોમાં આજે (મંગળવાર) સવારથી અચાનક હળવાથી મધ્યમ વરસાદના કારણે હવામાનમાં મોટો ફેરફાર જોવા મળ્યો છે. નોઇડા, ગાઝિયાબાદ, ગુરુગ્રામ સહિત NCRના અનેક વિસ્તારોમાં વરસાદના કારણે તાપમાનમાં નોંધપાત્ર ઘટાડો થયો છે. હવામાન વિભાગ (IMD)એ આજે, 27 જાન્યુઆરીના રોજ દિલ્હી-NCR માટે તેજ પવન સાથે વરસાદનું એલર્ટ જાહેર કર્યું છે.
દિલ્હી-NCRમાં IMDનું યેલો એલર્ટ
વરસાદના કારણે હવામાન બદલાતા દિલ્હી-NCRના તાપમાનમાં ઘટાડો નોંધાયો છે. તેજ પવનના કારણે ઠંડી અને હાડ થીજાવતી ઠંડીનો અહેસાસ વધી ગયો છે. ઉપરાંત, પર્વતીય વિસ્તારોમાં થયેલી બરફવર્ષાના કારણે મેદાની વિસ્તારોમાં પણ ઠંડીનો પ્રભાવ વધ્યો છે. દિલ્હી માટે હવામાન વિભાગે આજે વરસાદ અને ભારે પવનનું એલર્ટ આપ્યુ છે, જેના કારણે તાપમાનમાં વધુ ઘટાડો થવાની સાથે ઠંડી વધવાની શક્યતા છે.
મોટાભાગના વિસ્તારોમાં આજે બપોર સુધી હવામાનમાં ઉતાર-ચઢાવ જોવા મળશે
ભારત હવામાન વિજ્ઞાન વિભાગ (IMD)ના પૂર્વાનુમાન મુજબ, દિલ્હીના મોટાભાગના વિસ્તારોમાં આજે બપોર સુધી હવામાનમાં ઉતાર-ચઢાવ જોવા મળશે. દિલ્હી ખાતે વરસાદ સાથે ગાજવીજ થવાની સંભાવના છે. બપોર સુધી હળવાથી મધ્યમ વરસાદ પડી શકે છે.
હવામાન વિભાગ મુજબ દિલ્હી, નોઇડા, ગુરુગ્રામ, ફરીદાબાદ અને ગાઝિયાબાદમાં સવારથી વાદળછાયા વાતાવરણ સાથે અનેક વિસ્તારોમાં હળવો વરસાદ થયો છે. વરસાદને કારણે દિવસના તાપમાનમાં ઘટાડો નોંધાયો છે, જેના કારણે ઠંડીનો અહેસાસ વધ્યો છે. જોકે, વરસાદ બાદ પવનની ગતિ વધતા પ્રદૂષણમાં થોડી રાહત મળવાની શક્યતા વ્યક્ત કરવામાં આવી છે.
પર્વતીય વિસ્તારોમાં બરફવર્ષા અને મેદાની વિસ્તારોમાં વરસાદ
બીજી તરફ જમ્મુ-કાશ્મીર, હિમાચલ પ્રદેશ અને ઉત્તરાખંડના ઊંચાઈવાળા વિસ્તારોમાં તાજી બરફવર્ષા થઈ છે. ગુલમર્ગ, પહલગામ, મનાલી અને બદરીનાથ જેવા વિસ્તારો બરફની સફેદ ચાદરમાં ઢંકાઈ ગયા છે. બરફવર્ષાથી જ્યાં પ્રવાસીઓમાં ઉત્સાહ જોવા મળી રહ્યો છે, ત્યાં સ્થાનિક લોકોને ઠંડી અને વાહનવ્યવહાર સંબંધિત મુશ્કેલીઓનો સામનો કરવો પડી રહ્યો છે. અનેક પર્વતીય માર્ગો પર લપસણાં થવાના કારણે અવરજવર પ્રભાવિત થઈ છે.
હવામાન નિષ્ણાતોનું કહેવું છે કે પર્વતીય વિસ્તારોમાં બરફવર્ષા અને મેદાની વિસ્તારોમાં વરસાદ બાદ ઉત્તર-પશ્ચિમી ઠંડા પવનો ચાલવાની શક્યતા છે. તેના કારણે આગામી કેટલાક દિવસો સુધી ઉત્તર ભારતમાં સવાર અને રાત્રિના સમયે ઠંડીમાં વધારો થઈ શકે છે. જોકે, તેને ભારે ઠંડીની વાપસી માનવામાં આવી રહી નથી, પરંતુ હળવી ઠંડીનો અનુભવ ફરી થઈ શકે છે.
પૂર્વ ભારતના કેટલાક રાજ્યોમાં વાદળછાયું વાતાવરણ અને હળવા વરસાદની શક્યતા છે, જ્યારે દક્ષિણ ભારતના ઘણા વિસ્તારોમાં હવામાન સામાન્ય રહેશે. હવામાન વિભાગે લોકોને બદલાતા હવામાનને ધ્યાનમાં રાખીને સાવચેત રહેવાની સલાહ આપી છે, ખાસ કરીને પર્વતીય વિસ્તારોમાં મુસાફરી કરતા પહેલા હવામાનની માહિતી જરૂરથી મેળવવા જણાવ્યું છે.
આ પણ વાંચો: Weather Update: દિલ્હી-NCRમાં 26 જાન્યુઆરી સુધી વરસાદની શક્યતા નહીવત, ઠંડી અને ધુમ્મસનો કહેર
