જોધપુરના સગીરા પર બળાત્કારના કેસમાં આજીવન કેદની સજા ભોગવી રહેલા લંપટ આસારામની અંતરિમ જામીન અરજી પર સુપ્રીમ કોર્ટે એક મહત્વપૂર્ણ આદેશ આપ્યો છે. સર્વોચ્ચ અદાલતે દિલ્હી સ્થિત અખિલ ભારતીય આયુર્વિજ્ઞાન સંસ્થાન (AIIMS) ના વહીવટીતંત્રને આસારામની સ્વાસ્થ્ય સ્થિતિનું મૂલ્યાંકન કરવા માટે તાત્કાલિક ધોરણે એક વિશેષ મેડિકલ બોર્ડની રચના કરવાનો નિર્દેશ આપ્યો છે.
સુપ્રીમ કોર્ટે AIIMS ના ડાયરેક્ટરને તજજ્ઞ ડોક્ટરોની એક ટીમ બનાવવાની સૂચના આપી છે. આ મેડિકલ બોર્ડ આસારામના અત્યાર સુધીના તમામ મેડિકલ રિપોર્ટ્સની ઝીણવટભરી સમીક્ષા કરશે. જો આ સમીક્ષા દરમિયાન ડોક્ટરોની ટીમને જરૂર જણાશે, તો આસારામને પ્રત્યક્ષ ક્લિનિકલ તપાસ અને શારીરિક પરીક્ષણ માટે દિલ્હી AIIMS ખાતે બોલાવવામાં આવી શકે છે.
આસારામની કાનૂની ટીમની દલીલ
આસારામની કાનૂની ટીમે સુપ્રીમ કોર્ટમાં અંતરિમ જામીન માટે તેમની વધતી જતી ઉંમર અને બગડતી જતી શારીરિક સ્થિતિનો હવાલો આપ્યો હતો. વકીલોએ કોર્ટ સમક્ષ રજૂઆત કરી હતી કે આસારામ હૃદય રોગ, કિડનીની સમસ્યાઓ તેમજ હાડકાં સંબંધિત ગંભીર બીમારીઓથી પીડાઈ રહ્યા છે. આ પરિસ્થિતિમાં તેમને માનવતાના ધોરણે અને યોગ્ય તબીબી સારવાર મળી રહે તે માટે અંતરિમ જામીન આપવામાં આવે.
રાજ્ય સરકારને તમામ રિપોર્ટ સોંપવા સૂચના
કેસની સુનાવણી દરમિયાન સુપ્રીમ કોર્ટે રાજ્ય સરકારને સ્પષ્ટ આદેશ આપ્યો છે કે આસારામની અત્યાર સુધીની તમામ તબીબી તપાસના રિપોર્ટ્સ અને હેલ્થ અપડેટ્સ AIIMS ના મેડિકલ બોર્ડને વહેલી તકે પૂરા પાડવામાં આવે. જેથી કરીને સ્પેશિયાલિસ્ટ ડોક્ટર્સની ટીમ સાચા તારણ પર પહોંચી શકે.
મેડિકલ રિપોર્ટના આધારે થશે આગળનો નિર્ણય
સર્વોચ્ચ અદાલતે સ્પષ્ટ કર્યું છે કે AIIMS નું વિશેષ મેડિકલ કમિટી પોતાનો વિગતવાર હેલ્થ રિપોર્ટ કોર્ટ સમક્ષ રજૂ કરશે. આ રિપોર્ટ આવ્યા બાદ જ કોર્ટ આસારામને અંતરિમ જામીન આપવા કે નહીં તે અંગે આગળનો નિર્ણય લેશે. કેસની આગામી સુનાવણી પણ આ તબીબી અહેવાલના આધારે જ હાથ ધરવામાં આવશે. સુપ્રીમ કોર્ટે આ નિર્ણય માનવતાવાદી અભિગમ અપનાવીને અને યોગ્ય સ્વાસ્થ્ય સુવિધાઓને પ્રાથમિકતા આપવાના હેતુથી લીધો છે.
