સોશિયલ મીડિયા પર તાજેતરમાં એક દાવો વાયરલ થયો કે ભારતીય ટેન્કરને હોર્મુઝ સ્ટ્રેટ પાર કરવા માટે ટ્રાંઝિટ ફી ચૂકવવી પડી હતી અને આ ચુકવણી ચીનની કરન્સી યુઆનમાં કરવામાં આવી હતી. દાવામાં એવો પણ ઉલ્લેખ હતો કે આ ફી ચૂકવ્યા બાદ જ ઈરાને ભારતીય ટેન્કરને હોર્મુઝ સ્ટ્રેટ પાર કરવાની મંજૂરી આપી હતી.
પરંતુ ભારત સરકારે આ તમામ દાવાઓને સંપૂર્ણપણે ખોટા અને આધારહીન ગણાવીને નકારી કાઢ્યા છે. વિદેશ મંત્રાલય (MEA)એ સોમવારે પોતાના ફેક્ટ-ચેક હેન્ડલ મારફતે સ્પષ્ટ કર્યું કે સોશિયલ મીડિયા પર ફેલાતી આ માહિતી ફેક ન્યૂઝ છે. મંત્રાલયે 'ફેક ન્યૂઝ અલર્ટ' જાહેર કરીને લોકોને આવી ભ્રામક પોસ્ટ્સથી સાવચેત રહેવા અપીલ કરી છે. સરકારના જણાવ્યા મુજબ આવા ખોટા દાવાઓ દેશને બદનામ કરવાની યોજનાનો ભાગ છે.
આ અગાઉ પણ સરકારે એક અન્ય દાવાને ખોટો ગણાવ્યો હતો જેમાં કહેવાયું હતું કે અમેરિકા ઈરાન પર હુમલા માટે ભારત પાસેથી સૈનિક સહાય માગે છે. આ વચ્ચે હોર્મુઝ સ્ટ્રેટ અંગે વૈશ્વિક તણાવ પણ ચર્ચામાં છે, કારણ કે અહીંથી વિશ્વના લગભગ 20 ટકા તેલ અને ગેસનો પરિવહન થાય છે.
ઈરાન-અમેરિકા તણાવના કારણે આ માર્ગમાં અસ્થિરતા જોવા મળી રહી છે, જેના કારણે આંતરરાષ્ટ્રીય બજારમાં તેલના ભાવ પર પણ અસર પડી રહી છે. તેમ છતાં કૂટનીતિક પ્રયત્નો બાદ કેટલાક ભારતીય ટેન્કરોને આ માર્ગ પરથી પસાર થવાની મંજૂરી મળતી હોવાનું જાણવા મળ્યું છે. ઈરાને પણ જણાવ્યું છે કે મિત્ર દેશોના જહાજો માટે માર્ગ ખુલ્લો છે.
આ પણ વાંચો : Iran-Israel યુદ્ધની ટકાઉ માલસામાન પર પડી નકારાત્મક અસર, 20 ટકા સુધી કંપનીઓના શેરમાં થયો ઘટાડો