જમ્મુ-કાશ્મીરના 7 જિલ્લામાં 8 આતંકી સંગઠનો પર NIAના દરોડા

• ટેરર ફંડિંગ અને હથિયારો સપ્લાય કરવાના મામલે તપાસ
  
  
  
• આ આતંકી સંગઠનોને સીમા પારથી ડ્રોન દ્વારા હથિયારો પૂરા પાડવામાં આવ્યા હતા
• રાજૌરીમાં આતંકી સાથેનાં એન્કાઉન્ટર પછી આ પગલાં લેવામાં આવ્યા

નેશનલ ઈન્વેસ્ટિગેશન એજન્સી (NIA) દ્વારા મંગળવારે ટેરર ફંડિંગ તેમજ પાક. પ્રેરિત આતંકી કાવતરાંની તપાસ કરવાનાં મામલે જમ્મુ કાશ્મીરનાં 7 જિલ્લામાં 8 આતંકી સંગઠનોનાં 15 સ્થળો ખાતે દરોડા પાડવામાં આવ્યા હતા. જે સ્થળોએ દરોડા પાડવામાં આવ્યા છે તે લશ્કર એ તોયબા, જૈશ એ મોહમ્મદ અને ટીઆરએફનાં 8 આતંકી સંગઠનો સાથે સંકળાયેલા હતા. આ આતંકી સંગઠનો સાથે જોડાયેલા લોકો કાશ્મીર ખીણમાં બોમ્બ, IED, રોકડ, ડ્રગ્સ તેમજ નાના હથિયારો એકઠા કરીને તે જુદાજુદા આતંકી સંગઠનોને આપવાનું કામ કરતા હતા. તેમને સીમા પારથી ડ્રોન દ્વારા હથિયારો પૂરા પાડવામાં આવ્યા હતા. રાજૌરીમાં આતંકી સાથેનાં એન્કાઉન્ટર પછી આ પગલાં લેવામાં આવ્યા છે.

કયા આતંકી સંગઠનો પર દરોડા

લશ્કર એ તોયબા, જૈશ એ મોહમ્મદ, ટીઆરએફ, યુનાઈટેડ લિબરેશન ફરન્ટ જમ્મુ એન્ડ કાશ્મીર (UL J&K), મુજાહિદ્દીન ગઝવત ઉલ હિન્દ (MGH), જમ્મુ એન્ડ કાશ્મીર ફ્રીડમ ફાઈટર (JKFF), કાશ્મીર ટાઈગર્સ તેમજ પીપલ્સ એન્ટિ ફાસિસ્ટ ફરન્ટ (PAAF)નો સમાવેશ થાય છે. 7 જિલ્લામાં 15 સ્થળે રેડ પડાઈ હતી જેમાં અનંતનાગમાં 4, શોપિયાંમાં 3, બડગામમાં 2, શ્રીનગરમાં 2, પુંછમાં 2 તેમજ બારામુલ્લા અને રાજૌરીમાં 1-1 સ્થળનો સમાવેશ થાય છે.

તામિલનાડુમાં PFIના મદુરાઈ અધ્યક્ષની ધરપકડ

એનઆઈએ તેમજ પોલીસ દ્વારા તામિલનાડુમાં PFIનાં મદુરાઈ અધ્યક્ષ મોહમ્મદ કૈસરની ધરપકડ કરાઈ હતી. NIAની ટીમે મદુરાઈ, ત્રિચી, ડિંડીંગુલ, ચેન્નઈ સહિત 6 જગ્યાએ રેડ પાડી હતી. અન્ય 4 લોકોને પણ પકડી લેવાયા હતા.