પવન કલ્યાણે પીએમ મોદીને લખ્યો પત્ર, 35141 કરોડના કૌભાંડનો આરોપ

• આંધ્રપ્રદેશ સરકાર પર જમીનની ફાળવણીમાં ભ્રષ્ટાચારનો આરોપ
  
• વાયએસ જગન મોહન રેડ્ડી સરકારે જમીન સંપાદનના નામે છેતરપિંડી આચરી
• જમીન સંપાદનમાં 35,141 કરોડ રૂપિયાની ગેરરીતિઓ થઈ: પવન કલ્યાણ 

અભિનયથી રાજકારણમાં આવેલ અને જનસેના પાર્ટીના સ્થાપક પવન કલ્યાણે શનિવારે વડાપ્રધાન નરેન્દ્ર મોદીને પત્ર લખીને વાયએસ જગન મોહન રેડ્ડીની આગેવાની હેઠળની આંધ્રપ્રદેશ સરકાર પર ગરીબોને જમીન ફાળવવા અને આવાસ યોજનાના નામે મોટા પ્રમાણમાં ભ્રષ્ટાચાર આચરવામાં આવતો હોવાનો આરોપ લગાવ્યો છે. કલ્યાણે આરોપ લગાવ્યો છે કે માત્ર જમીન સંપાદનમાં 35,141 કરોડ રૂપિયાની ગેરરીતિઓ થઈ છે.

જનસેના પ્રમુખ પવન કલ્યાણએ પત્ર લખીને કહ્યું છે કે જમીન સંપાદનના નામે છેતરપિંડી એટલા મોટા પ્રમાણમાં છે કે સત્તાધારી પક્ષના એક ધારાસભ્ય પોતે રાજ્ય તકેદારી અને અમલ વિભાગને તપાસની માંગ કરી રહ્યા છે.

કલ્યાણએ દાવો કર્યો છે કે જમીનની કિંમત કૃત્રિમ રીતે વધારવામાં આવી હતી, પરંતુ માલિકોને નામ માત્રની ચુકવણી કરવામાં આવી છે જ્યારે YSRCP નેતાઓએ બાકીના પૈસા તેમના ખિસ્સામાં મૂકી દીધા છે. કલ્યાણએ અન્ય ઘણી બધી ગેરરીતિઓ પણ થઈ હોવાનું જણાવ્યું હતું.

કલ્યાણએ પત્રમાં મુદ્દાઓને લઈને વધુ જાણકારી આપી છે અને વડાપ્રધાન નરેન્દ્ર મોદીને કેન્દ્રીય તપાસ એજન્સીઓ પાસે યોગ્ય કાર્યવાહી કરાવવા માંગ કરી છે. તેમજ તેમણે ઉચાપત કરવામાં આવેલ રકમ વસૂલ કરીને દોષિયોને સજા અપાવવા માટે પણ વિનંતી કરી છે.