- ઉત્તરકાશી ટનલ રેસક્યુનો 14મો દિવસ
- ઓગર મશીન ચાલુ કરવામાં આવ્યો અવરોધ
- પીએમ મોદીએ કરી સીએમ ધામી સાથે વાતચીત
પીએમ મોદી સિલ્ક્યારા ખાતે નિર્માણાધીન ટનલમાં ફસાયેલા કામદારોને બચાવવા ચાલી રહેલા ઓપરેશન અંગે બાજ નજર રાખી રહ્યા છે. ત્યારે આજે પણ રેસક્યુને લઇને પીએમ મોદીએ સીએમ ધામી સાથેથી પળેપળની માહિતી મેળવી હતી. સાથે જ રેસક્યુ ઓપરેશનમાં કમી ન રહે તે માટે કેટલીક સૂચનાઓ પણ આપી હતી.
સીએમ ધામીએ શું કરી વાત ?
આ અંગે સીએમ ધામીએ ટ્વિટ કરતા માહિતી આપી હતી કે શ્રમિકોની સુખાકારી અને સિલ્ક્યારા ટનલમાં ચાલી રહેલી રાહત અને બચાવ કામગીરી વિશે દરરોજ વિગતવાર માહિતી પીએમ મોદી લઇ રહ્યા છે. કેન્દ્રીય એજન્સીઓ, રાજ્ય પ્રશાસન અને આંતરરાષ્ટ્રીય નિષ્ણાતોની ટીમો સાથે મળીને કામ કરી રહી છે અને ટૂંક સમયમાં જ અમે અમારા ભાઈઓને સુરક્ષિત રીતે બહાર કાઢવામાં સફળ થઈશું. દરરોજની જેમ શુક્રવારે પણ વડા પ્રધાને મુખ્ય પ્રધાન પાસેથી ફોન પર સિલ્ક્યારા ટનલમાં ફસાયેલા 41 કામદારો અને તેમના પરિવારો વિશે અપડેટ્સ લીધા હતા.
પીએમએ શું કહ્યું ?
મુખ્યમંત્રીએ તેમને જણાવ્યું કે આ ટનલ ન્યૂ ઓસ્ટ્રિયન ટનલ મેથડનો ઉપયોગ કરીને બનાવવામાં આવી રહી છે. ટનલમાં સ્ટીલની વસ્તુઓ આવી જવાને કારણે ઓગર મશીનને થોડું નુકસાન થયું છે. તેને ઠીક કરવામાં આવી રહ્યું છે. થોડા સમય માટે કામગીરી બંધ કરી દેવામાં આવી છે. PMમોદીએ સીએમ પાસેથી ટનલની અંદર ફસાયેલા કામદારોની સ્થિતિ અને તેમને આપવામાં આવતી ખાદ્યપદાર્થો અને રોજિંદી વસ્તુઓ વિશે માહિતી લીધી હતી. રાહત અને બચાવ કાર્યમાં લાગેલા કામદારોની સ્થિતિ અને તેમના માટે લેવામાં આવતા સુરક્ષા પગલાં વિશે પણ પૂછવામાં આવ્યું. તેમણે સૂચના આપી હતી કે તેમાં કોઈપણ પ્રકારની કમી ન રહેવી જોઈએ. તેમણે બચાવ કાર્યની પ્રગતિ અને થઈ રહેલી કામગીરીની સાથે વિવિધ એજન્સીઓ વચ્ચે સંકલન સાધવા જણાવ્યું હતું.
વૈકલ્પિક લાઇન બનાવવામાં આવી
મુખ્યમંત્રીએ પીએમને કહ્યું કે, સફળતાપૂર્વક છ ઈંચ વ્યાસની પાઈપલાઈન બાદ વૈકલ્પિક લાઈફલાઈન બનાવવામાં આવી છે. જેના દ્વારા તાજો રાંધેલો ખોરાક, ફળો, ડ્રાયફ્રૂટ્સ, દૂધ, જ્યુસ તેમજ ડિસ્પોઝેબલ પ્લેટ, બ્રશ, ટુવાલ, નાના કપડા, ટૂથ પેસ્ટ, સાબુ વગેરે રોજિંદી જરૂરિયાતો બોટલોમાં પેક કરીને ટનલમાં ફસાયેલા કામદારોને મોકલવામાં આવી રહી છે. આ પાઈપલાઈન દ્વારા SDRF ના કોમ્યુનિકેશન સેટઅપ દ્વારા કામદારો સાથે નિયમિત વાતચીત થઈ રહી છે. કામદારો અને તેમના પરિવારના સભ્યો સાથે પણ વાતચીત કરવામાં આવી રહી છે.
