PM મોદીની અધ્યક્ષતામાં નીતિ આયોગની મહત્ત્વની બેઠક, વિકસિત ભારત પર ચર્ચા થશે

પ્રધાનમંત્રી નરેન્દ્ર મોદી આજે શનિવારે નીતિ આયોગની ટોચની સંસ્થા ગવર્નિંગ કાઉન્સિલની 10મી બેઠકની અધ્યક્ષતા કરશે. એવું માનવામાં આવે છે કે આ બેઠકમાં 2047 સુધીમાં ભારતને વિકસિત રાષ્ટ્ર બનાવવાના મુસદ્દા પર ચર્ચા થઈ શકે છે. મોટાભાગના રાજ્યોના મુખ્યમંત્રીઓ પણ આ બેઠકમાં હાજરી આપે તેવી અપેક્ષા છે.

પહલગામ આતંકવાદી હુમલા બાદ ભારત દ્વારા 'ઓપરેશન સિંદૂર' દ્વારા કરવામાં આવેલી કાર્યવાહી બાદ પીએમ મોદીની તમામ રાજ્યો અને કેન્દ્રશાસિત પ્રદેશોના મુખ્યમંત્રીઓ સાથે આ પહેલી મોટી બેઠક છે.

ડોનાલ્ડ ટ્રમ્પના ટેરિફ વિવાદ વચ્ચે મહત્વપૂર્ણ બેઠક

ગયા મહિને એપ્રિલમાં અમેરિકન રાષ્ટ્રપતિ ડોનાલ્ડ ટ્રમ્પ દ્વારા ભારતીય ઉત્પાદનો પર બદલો લેવા માટે ટેરિફ લાદવામાં આવ્યા બાદ અર્થતંત્ર ભારે મુશ્કેલીઓનો સામનો કરી રહ્યું હોવાનું કહેવામાં આવી રહ્યું છે. જોકે, તમામ પડકારો છતાં, ચાલુ નાણાકીય વર્ષમાં ભારતનો વિકાસ દર 6.2-6.7 ટકા રહેવાની ધારણા છે.

ગવર્નિંગ કાઉન્સિલ દર વર્ષે મળે છે

નીતિ આયોગની સર્વોચ્ચ સંસ્થા, ગવર્નિંગ કાઉન્સિલની બેઠકમાં તમામ મુખ્યમંત્રીઓ, કેન્દ્રશાસિત પ્રદેશોના ઉપરાજ્યપાલો તેમજ અનેક કેન્દ્રીય મંત્રીઓ હાજરી આપે છે. પીએમ મોદી નીતિ આયોગના હોદ્દેદાર અધ્યક્ષ છે. જોકે, ગયા વર્ષે 10 રાજ્યો અને કેન્દ્રશાસિત પ્રદેશોએ ગવર્નિંગ કાઉન્સિલની મહત્વપૂર્ણ બેઠકમાં ભાગ લીધો ન હતો.

ગવર્નિંગ કાઉન્સિલની આ મહત્વપૂર્ણ બેઠક સામાન્ય રીતે દર વર્ષે યોજાય છે અને ગયા વર્ષે આ બેઠક 27 જુલાઈના રોજ યોજાઈ હતી. નીતિ આયોગ ભારતને 2047 સુધીમાં 30 ટ્રિલિયન ડોલરનું વિકસિત અર્થતંત્ર બનાવવા માટે એક વિઝન તૈયાર કરી રહ્યું છે.

આ બાબત સાથે સંકળાયેલા એક અધિકારીએ જણાવ્યું હતું કે નીતિ આયોગની ટોચની ગવર્નિંગ કાઉન્સિલની બેઠકમાં, બજેટ 2025-26માં શરૂ કરાયેલી ઘણી નવી પહેલો અને ભારતીય અર્થતંત્ર સામેના પડકારો પર પણ ચર્ચા થવાની અપેક્ષા છે.