- લોકસભાની ચૂંટણીને લઇને બીજેપીનો તેજ પ્રચાર
- પ.બંગાળની ઉમેદવાર સાથે પીએમ મોદીએ કરી વાતચીત
- રાજમાતા અમૃતા રોય ટીએમસીના મહુઆ મોઇત્રા વિરુદ્ધ મેદાને
પીએમ નરેન્દ્ર મોદીએ પશ્ચિમ બંગાળની કૃષ્ણનગર બેઠક પરથી તૃણમૂલ કોંગ્રેસના નેતા મહુઆ મોઇત્રા સામે ભાજપના લોકસભા ચૂંટણીના ઉમેદવાર રાજમાતા અમૃતા રોય સાથે વાત કરી હતી.
ગઠબંધન પર પીએમ મોદીએ કર્યા પ્રહાર
અમૃતા રોય સાથે ફોન પર વાત કરતી વખતે પીએમ મોદીએ વિપક્ષી ગઠબંધન ભારત પર પણ નિશાન સાધ્યું હતું. નામ લીધા વિના તેમણે કહ્યું કે, એક તરફ ભાજપ દેશમાંથી ભ્રષ્ટાચાર નાબૂદ કરવાની પ્રતિબદ્ધતા ધરાવે છે. બીજી તરફ, બધા ભ્રષ્ટાચારીઓ એકબીજાને બચાવવા માટે એક થયા છે." આ દરમિયાન, તેમણે વિશ્વાસ વ્યક્ત કર્યો કે પશ્ચિમ બંગાળના લોકો પરિવર્તન માટે લોકસભાની ચૂંટણીમાં ભાજપને મત આપશે.
PM મોદીએ શું કરી વાત ?
વડાપ્રધાન મોદીએ રાજમાતા અમૃતા રોયને કહ્યું કે ભ્રષ્ટાચારીઓએ સામાન્ય જનતાના પૈસા લૂંટી લીધા છે અને EDએ તે ભ્રષ્ટાચારીઓ પાસેથી જે પણ સંપત્તિ અને પૈસા જપ્ત કર્યા છે તે ગરીબ લોકોને પરત કરવા જોઈએ. તે આની ખાતરી કરવા માટે કાયદાકીય વિકલ્પો શોધી રહ્યા છે.
કોણ છે અમૃતા રૉય ?
અમૃતા રોય મહારાજા રુદ્ર ચંદ્ર રોય અને કૃષ્ણચંદ્ર રોયના નાદિયા રાજ પરિવારના 39મા વંશજ સૌમિશ ચંદ્ર રોયની પત્ની છે. સૌમિશ ચંદ્ર રોય એક એરલાઇનના નિવૃત્ત કર્મચારી છે. જ્યારે તેમનો પુત્ર મનીષ કલકત્તા હાઈકોર્ટમાં પ્રેક્ટિસ કરે છે. લા માર્ટિનિયર સ્કૂલ અને લોરેટો કૉલેજમાં ભણેલા અમૃતા પોતે વ્યવસાયે ફેશન કન્સલ્ટન્ટ છે. તેમના જણાવ્યા મુજબ તેમના પરિવારના ત્રણ સભ્યોમાંથી કોઈને પણ અગાઉ રાજકારણ સાથે સંબંધ રહ્યો નથી. પરંતુ રાજનીતિમાં આવવાના મારા નિર્ણયને પરિવારે સપોર્ટ આપ્યો છે. મહારાજા કૃષ્ણચંદ્ર રોયે 1683માં શરૂઆત બાદથી જ તેઓ નાદિયા રાજ પરિવારની દુર્ગા પૂજાને સાર્વજનિક ઉત્સવના રૂપમાં ફેરવી દીધો હતો. અને આ કારણથી જ આ પરિવારની આજે પણ બંગાળમાં વિશેષ પ્રતિષ્ઠા છે.
રૉયલ પરિવાર સાથે શું છે સંબંધ ?
વિશ્વની સૌથી મોટી લોકશાહીની લોકસભાની ચૂંટણીમાં આ વખતે મહારાજા કૃષ્ણચંદ્રનું નામ રાજકારણ સાથે સીધું જોડાઈ રહ્યું છે. અમૃતા રોય કૃષ્ણનગરના પ્રતિષ્ઠિત રોયલ પેલેસના રાણી માતા છે. તેમની સંભવિત ઉમેદવારી અંગે છેલ્લા કેટલાક દિવસોથી અટકળો ચાલી રહી હતી.
20 માર્ચે જોડાયા હતા ભાજપમાં
bjpએ પશ્ચિમ બંગાળની કૃષ્ણનગર લોકસભા સીટ પરથી મહુઆ મોઇત્રા સામે ચૂંટણી લડવા માટે અમૃતા રોયને ટિકિટ આપી છે. અમૃતા 20 માર્ચે ભારતીય જનતા પાર્ટીમાં જોડાયા હતા. તેમણે બંગાળના વિપક્ષી નેતા સુવેન્દુ અધિકારીની હાજરીમાં ભાજપની સદસ્યતા મેળવી હતી.
