- કાનપુર હિંસામાં સોમવારે વધુ 9 આરોપીઓની ધરપકડ કરી
- કાનપુર હિંસા કેસમાં ધરપકડ કરાયેલા કુલ આરોપીઓની સંખ્યા વધીને 38 થઈ
- પોલીસે સોમવારે એક પોસ્ટર પણ બહાર પાડ્યું છે, જેમાં 40 આરોપીઓની તસવીરો લગાવવામાં આવી
પોલીસે કાનપુરમાં ગયા શુક્રવાર થયેલ હિંસાની સંડોવણી બદલ સોમવારે વધુ 9 આરોપીઓની ધરપકડ કરી હતી, ત્યારબાદ આ કેસમાં ધરપકડ કરાયેલા કુલ આરોપીઓની સંખ્યા વધીને 38 થઈ ગઈ છે. આ દરમિયાન, પોલીસે જણાવ્યું હતું કે હિંસામાં કથિત રીતે સામેલ મુખ્ય આરોપીઓના હોર્ડિંગ્સ બનાવવામાં આવ્યા છે અને અસરગ્રસ્ત વિસ્તારો અને આસપાસના વિસ્તારોમાં મુખ્ય સ્થાનો પર મૂકવામાં આવશે. પોલીસે સોમવારે એક પોસ્ટર પણ બહાર પાડ્યું છે, જેમાં 40 આરોપીઓની તસવીરો લગાવવામાં આવી છે.
અધિક પોલીસ કમિશનર (કાયદો અને વ્યવસ્થા) આનંદ પ્રકાશ તિવારીએ કહ્યું હતું કે, "અમે CCTV ફૂટેજ અને વીડિયો ક્લિપ્સ દ્વારા લગભગ 100 વધુ તોફાનીઓ અને પથ્થરબાજોની ઓળખ કરી છે." તપાસ અભિયાન ચાલુ છે અને તોફાનીઓની વહેલી તકે ધરપકડ કરવામાં આવે તે સુનિશ્ચિત કરવા માટે તમામ સંભવિત સ્થળોએ દરોડા પાડવામાં આવી રહ્યા છે.
ડેપ્યુટી કમિશનર ઓફ પોલીસ (પૂર્વ) (ડીસીપી) પ્રમોદ કુમારે જણાવ્યું હતું કે, 3 જૂનની હિંસામાં કથિત રીતે સંડોવાયેલા લગભગ 20 મુખ્ય આરોપીઓની તસવીરો સાથેના 25 હોર્ડિંગ્સ પ્રભાવિત વિસ્તારોમાં અને તેની આસપાસના મુખ્ય સ્થાનો પર લગાવવામાં આવશે.
તેમણે કહ્યું કે, લોકોને આ તોફાનીઓને ઓળખવામાં પોલીસને મદદ કરવા અને તેમના વિશે માહિતી આપવા અપીલ કરવામાં આવશે. અમે વીડિયો ક્લિપ અને CCTV ફૂટેજ દ્વારા આરોપીઓના ફોટોગ્રાફ્સ એકત્ર કર્યા છે.
આ ઉપરાંત, DCP (દક્ષિણ) સંજીવ ત્યાગીની આગેવાની હેઠળની વિશેષ તપાસ ટીમ (SIT) ની મદદ માટે વધુ 3 વિશેષ ટીમો બનાવવામાં આવી છે. પ્રથમ વિશેષ ટીમમાં 4 સભ્યોનો સમાવેશ થાય છે, જેનું નેતૃત્વ એડિશનલ DCP (પૂર્વ) રાહુલ મીઠા કરશે. તમામ આરોપીઓને ઓળખવા માટે CCTV ફૂટેજ પર નજર રાખવા અને SITને CCTV ફૂટેજ સોંપવા માટે તેની રચના કરવામાં આવી છે.
આસિસ્ટન્ટ ડેપ્યુટી કમિશનર સ્વરૂપ નગર બ્રિજનારાયણ સિંહના નેતૃત્વમાં અન્ય 5 સભ્યોની વિશેષ ટીમને પેટ્રોલ પંપમાંથી ખુલ્લી બોટલો અને કન્ટેનરમાં પેટ્રોલ આપવાના કેસની તપાસની જવાબદારી સોંપવામાં આવી છે.
આસિસ્ટન્ટ ડેપ્યુટી કમિશનર(છાવણી)ની આગેવાની હેઠળની ત્રીજી ટીમ સોશિયલ મીડિયા પર ઉશ્કેરણીજનક, ખોટી અને નફરત ફેલાવનાર પોસ્ટ પર નજર રાખશે.
