- કોલકાતામાં ઠેર ઠેર ભરાયા પાણી
- રાહત અને બચાવ કામગીરી માટે 14 ટીમ તૈનાત
- ભારતીય નૌસેના પણ એલર્ટ
બંગાળની ખાડીમાંથી ઉદ્ભવેલુ ચક્રવાતી તોફાન રેમલ નબળુ પડ્યુ છે. હાલ તે પશ્ચિમ બંગાળથી આગળ વધી ચૂક્યુ છે. પરંતુ ચક્રવાતને પગલે હવામાન વિભાગે એલર્ટ આપ્યુ છે. તોફાની પવન સાથે ભારે વરસાદની આગાહી કરી છે.
ઉત્તર પૂર્વ તરફ આગળ વધ્યુ ચક્રવાત
મહત્વનું છે કે ગઈકાલે રાત્રે આ વાવાઝોડું પશ્ચિમ બંગાળના દરિયાકાંઠે ત્રાટક્યું હતું પરંતુ તે તેનું આક્રમક સ્વરૂપ બતાવતા પહેલા ત્યાંથી પસાર થઈ ગયું હતું. બંગાળના દરિયાકાંઠે ત્રણ કલાક સુધી લેન્ડફોલ ચાલુ રહ્યો હતો. હવામાન વિભાગે કહ્યું કે ચક્રવાત 'રેમલ' ઉત્તર-પૂર્વ તરફ આગળ વધી રહ્યું છે. બંગાળના ઘણા વિસ્તારોમાં રાતભર ભારે વરસાદ થયો હતો. સુરક્ષાને ધ્યાને રાખીને લગભગ 1.25 લાખ લોકોને સુરક્ષિત વિસ્તારોમાં ખસેડવામાં આવ્યા હતા.
કોલકાતા સહિત અહીં રેડ એલર્ટ
ચક્રવાત રેમલને કારણે આજે સોમવારે પણ સમગ્ર દક્ષિણ બંગાળમાં જોરદાર પવન ફૂંકાવાની સંભાવના છે. નાદિયા અને મુર્શિદાબાદમાં આજે તોફાન અને વરસાદની સંભાવનાને પગલે
રેડ એલર્ટ આપવામાં આવ્યું છે. પવન 50-60 કિમી પ્રતિ કલાકની ઝડપે ફૂંકાય તેવી શક્યતા છે. કોલકાતા, હાવડા, હુગલી, દક્ષિણ 24 પરગણા સહિત બંગાળના ઘણા જિલ્લાઓમાં આજે પણ જોરદાર પવન ફૂંકાવાની સંભાવના છે.
બંગાળમાં બુધવાર સુધી વરસાદની શક્યતા
પશ્ચિમ બંગાળમાં બંગાળમાં બુધવાર સુધી વરસાદની સંભાવના છે. કોલકાતામાં ભારે પવન સાથે વરસાદ ચાલુ છે. NDRFની 14 ટીમોને બંગાળમાં રાહત અને બચાવ માટે તૈનાત કરવામાં આવી છે. PM મોદીએ REMAL ની તૈયારીઓની સમીક્ષા કરવા બેઠક યોજી હતી. તેમણે ગૃહ મંત્રાલયને ચક્રવાતના આગમન પછીની સ્થિતિ પર નજર રાખવા અને સમીક્ષા કરવા અને સેવાઓ પુનઃસ્થાપિત કરવા માટે જરૂરી સહાય પૂરી પાડવા જણાવ્યું હતું.
આ રાજ્યોમાં એલર્ટ જાહેર
IMDએ જણાવ્યું કે ચક્રવાતી તોફાન 'રેમાલ' બાંગ્લાદેશ અને પશ્ચિમ બંગાળના દરિયાકાંઠાને પાર કરી રહ્યું છે.. તેમણે કહ્યું કે હવે તોફાન ધીમે ધીમે નબળું પડી રહ્યું છે. હવામાન વિભાગે રેમલ તોફાનને લઈને બંગાળ, ઓડિશા સહિત ઘણા રાજ્યોમાં એલર્ટ જાહેર કર્યું છે. NDRFની 14 ટીમોએ આખી રાત મોરચો સંભાળ્યો હતો. ઘણી ફ્લાઇટ્સ રદ કરવામાં આવી હતી. ડઝનબંધ ટ્રેનોને અસર થઈ હતી. કોલકાતા એરપોર્ટ આજે સવારે 9 વાગ્યા સુધી બંધ છે.
[[$googlead]]
