- વર્ષ 2023માં કુલ સંપત્તિ 3.21 કરોડ રૂપિયા છે
- આજ સુધી તેમની પાસે એક પણ કાર નથી
- તેમની સ્થાવર સંપત્તિ 2.10 કરોડ રૂપિયા છે
હાલમાં 4 રાજ્યની વિધાનસભાની ચૂંટણીના પરિણામ જાહેર થઈ રહ્યા છે. ત્યારે પ્રારંભિક વલણોમાં મધ્યપ્રદેશમાં ભાજપની જીત લગભગ નક્કી જોવા મળી રહી છે. આ વચ્ચે શિવરાજ સિંહ પાંચમી વખત રાજ્યના મુખ્યમંત્રી તરીકે શપથ લઈ શકે છે. ચૂંટણી પંચને આપેલી એફિડેવિટ મુજબ છેલ્લા પાંચ વર્ષમાં તેમની નેટવર્થમાં લગભગ 5 લાખ રૂપિયાનો ઘટાડો થયો છે. એટલું જ નહીં તેની પાસે કાર પણ નથી.
આ અંગેની માહિતી અનુસાર, ચૂંટણી પંચમાં શિવરાજ સિંહે જમા કરાવેલી એફિડેવિટ અનુસાર, વર્ષ 2023માં તેમની કુલ સંપત્તિ 3.21 કરોડ રૂપિયા છે જ્યારે તેમની પત્ની સાધના સિંહની કુલ સંપત્તિ 5.41 કરોડ રૂપિયા છે. પાંચ વર્ષ પહેલા શિવરાજ સિંહ ચૌહાણની સંપત્તિ 3.26 કરોડ રૂપિયા હતી. શિવરાજ સિંહની સંપત્તિ 1,11,20,282 રૂપિયા અને સ્થાવર સંપત્તિ 2.10 કરોડ રૂપિયા છે.
તેમજ બેંક ખાતામાં 1,15,000 રૂપિયા રોકડ, 96 ગ્રામ દાગીના અને 92,79,104 રૂપિયા છે. તેમની પત્ની સાધના સિંહની જંગમ સંપત્તિ 1,09,14,644 રૂપિયા છે. તેમાં 1,10,000 રૂપિયા રોકડા, 535 ગ્રામ જ્વેલરી અને બેંક ખાતામાં 71,87,544 રૂપિયા જમા છે. સાધના સિંહની કુલ સ્થાવર સંપત્તિ 4.32 કરોડ રૂપિયા છે.
2018માં યોજાયેલી છેલ્લી વિધાનસભા ચૂંટણીમાં શિવરાજ સિંહ ચૌહાણે નોમિનેશન વખતે પોતાની સમગ્ર સંપત્તિની વિગતો આપી હતી. શિવરાજ અને તેમની પત્ની સાધનાની કુલ સંપત્તિ 7.66 કરોડ રૂપિયા હતી, જે હવે 8.62 કરોડ રૂપિયા પર પહોંચી ગઈ છે. એટલે કે છેલ્લા પાંચ વર્ષમાં શિવરાજની સંપત્તિમાં 5 લાખ રૂપિયાનો ઘટાડો થયો છે, જ્યારે તેમની પત્ની સાધના સિંહની સંપત્તિમાં 1.01 કરોડ રૂપિયાનો વધારો થયો છે. જો ચૌહાણ દંપતીની કુલ સંપત્તિની વાત કરીએ તો છેલ્લા પાંચ વર્ષમાં તેમાં 96 લાખ રૂપિયાનો વધારો થયો છે.
