પુરુષો માટેના ગર્ભનિરોધક ઇન્જેક્શનનું સફળ પરીક્ષણ

• એકવાર આ ઇન્જેક્શન લીધા પછી 13 વર્ષ સુધી પિતા નહીં બની શકે
  
  
  
• ઇન્જેક્શન કોઈ પણ પ્રકારની ગંભીર આડઅસર વિના ઘણું કારગત
• નવી દિલ્હી, ઉધમપુર, લુધિયાણા, જયપુર અને ખડગપુરમાં ટ્રાયલ હાથ ધરાઈ

ઇન્ડિયન કાઉન્સિલ ઓફ મેડિકલ રિસર્ચે (ICMR) પુરુષો માટેના ગર્ભનિરોધક ઇન્જેક્શનની સફળ ક્લિનિકલ ટ્રાયલ પૂર્ણ કરી લીધી છે. ટ્રાયલથી જાણવા મળ્યું છે કે આ ઇન્જેક્શન કોઈ પણ પ્રકારની ગંભીર આડઅસર વિના ઘણું કારગત છે. પાછલા 7 વર્ષ દરમિયાન હાથ ધરાયેલી ત્રીજા તબક્કાની ક્લિનિકલ ટ્રાયલના પરિણામ ગયા મહિને એન્ડ્રોલોજી ઓપન એક્સેસ જર્નલમાં પ્રકાશિત થયા હતા. ટ્રાયલમાં 25થી 40 વર્ષની ઉંમરના 303 તંદુરસ્ત પરિણીત પુરુષો જોડાયા હતા. આ લોકોને 60 મિલીગ્રામનું ઇન્જેક્શન અપાયું હતું. નવી દિલ્હી, ઉધમપુર, લુધિયાણા, જયપુર અને ખડગપુરમાં ટ્રાયલ હાથ ધરાઈ હતી. આ ગર્ભનિરોધક ઇન્જેક્શન લેનારા પુરુષે 13 વર્ષ સુધી અન્ય ગર્ભનિરોધકોનો ઉપયોગ કરવાની જરૂર નહીં પડે. મતલબ કે તે એકવાર આ ઇન્જેક્શન લીધા પછી 13 વર્ષ સુધી પિતા નહીં બની શકે. આ ગર્ભનિરોધક ઇન્જેક્શનની સફળ ટ્રાયલથી મહિલાઓને ગર્ભનિરોધકનો ઉપયોગ કરવાથી મુક્તિ મળશે.

ગર્ભનિરોધક ઇન્જેક્શનનું નામ છે RISUG

દુનિયાભરના વિજ્ઞાનીઓ પુરુષો માટે ગર્ભનિરોધક દવા બનાવવા મથી રહ્યા છે પણ તેમાં તેમને હજુ સુધી સંપૂર્ણ સફળતા નથી મળી જ્યારે ICMR દ્વારા તૈયાર કરાયેલા ઇન્જેક્શનથી ગર્ભનિરોધમાં સંપૂર્ણ સફળતા મળવાની ગેરંટી છે. આ ઇન્જેક્શનનું નામ રિવર્સિબલ ઇનહિબિશન ઓફ સ્પર્મ અન્ડર ગાઇડન્સ (RISUG) છે.

પતિ-પત્નીમાંથી કોઈ પર આડઅસર નહીં

ટ્રાયલ દરમિયાન આ ઇન્જેક્શન પ્રેગ્નન્સી રોકવામાં 99.02 ટકા અસરકારક જણાયું છે. ઇન્જેક્શન લેનારા પુરુષો પર કે તેમની પત્નીઓ પર કોઈ જ આડઅસર જોવા મળી નહોતી. ડૉક્ટર્સના જણાવ્યાનુસાર RISUG ઇન્જેક્શન સ્પર્મ ડક્ટમાં અપાશે અને ઇન્જેક્શન આપતાં પહેલાં લોકલ એનેસ્થેસિયા અપાશે. RISUGને એક પછી એક સ્પર્મ ડક્ટ્સમાં ઇન્જેક્ટ કરાયા બાદ હાઇલી ચાર્જ્ડ પોલિમર સ્પર્મ ડક્ટની આંતરિક દીવાલમાં ચોંટી જાય છે અને પોલિમર નેગેટિવ ચાર્જ્ડ સ્પર્મના સંપર્કમાં આવે ત્યારે તેને નષ્ટ કરી દે છે, જેથી તે એગ્સ ફર્ટિલાઇઝ કરવા સક્ષમ નથી રહેતા.