- પંજાબમાં આપ પાર્ટીને ઝટકો
- ભાજપમાં સામેલ થયા સુશીલ કુમાર રિંકૂ
- શીતલ અંગુરાલ પણ ભાજપમાં જોડાયા
પંજાબમાં આમ આદમી પાર્ટીને બુધવારે જોરદાર આંચકો લાગ્યો છે. પાર્ટીના એકમાત્ર સાંસદ સુશીલ કુમાર રિંકુ ભાજપમાં જોડાયા છે. પાર્ટીએ જલંધરથી રિંકુને ટિકિટ આપી હતી. તેમની સાથે જલંધર પશ્ચિમના AAP ધારાસભ્ય શીતલ અંગુરાલ પણ ભાજપમાં જોડાયા છે. આ પહેલા શીતલ અંગુરાલે પાર્ટીમાંથી રાજીનામું આપી દીધું હતું.
હું અમિતશાહ-પીએમ મોદીની કાર્યશૈલીથી પ્રભાવિત-સુશીલ કુમાર
ભાજપમાં જોડાયા બાદ સુશીલ કુમાર રિંકુએ કહ્યું કે એ વાત સાચી છે કે મેં જાલંધરના લોકોને જે વચનો આપ્યા હતા તે પૂરા થયા નથી કારણ કે મારી પાર્ટી (આપ)એ મને સમર્થન આપ્યું નથી. હું પીએમ નરેન્દ્ર મોદી અને ગૃહમંત્રી અમિત શાહની કાર્યશૈલીથી પ્રભાવિત છું.
AAPના એકમાત્ર સાંસદ હતા રિંકૂ
બંને નેતાઓના ભાજપમાં જોડાવાની અફવાઓ ઘણા સમયથી ચાલી રહી હતી. પરંતુ તે સમયે સાંસદ રિકુને સ્પષ્ટતા કરી હતી કે તેમની વફાદારી હંમેશા આમ આદમી પાર્ટી સાથે રહેશે અને તેઓ ક્યાંય જવાના નથી. એ જ રીતે અંગુરાલે સોશિયલ મીડિયા પર લાઈવ કહ્યું હતું કે આ બધી વાતો પાયાવિહોણી છે. રિંકુ ગયા વર્ષે જલંધર પેટાચૂંટણી જીતીને સાંસદ બન્યા હતા. તેઓ લોકસભામાં AAPના એકમાત્ર સાંસદ છે. રિંકુ અગાઉ કોંગ્રેસમાં હતા. તેઓ 27 એપ્રિલ, 2023 ના રોજ AAP માં જોડાયા અને એક દિવસ પછી તેમને જલંધર સંસદીય મતવિસ્તારમાંથી AAP ઉમેદવાર જાહેર કરવામાં આવ્યા.
