- આશિષ મિશ્રાને જેલમાંથી જામીન પર છોડવામાં ન આવે: યોગી સરકાર
- ટ્રાયલ પૂર્ણ થાય ત્યાં સુધી જેલમાંથી મુક્ત કરવામાં ન આવે
- અલ્હાબાદ હાઈકોર્ટે જામીન આપવાનો કર્યો ઈન્કાર
લખીમપુર ખેરી ખાતે ખેડૂતોને કાર વડે કચડી નાખવાના આરોપી આશિષ મિશ્રાના જામીનનો યુપી સરકારે સુપ્રીમ કોર્ટમાં વિરોધ કર્યો છે. રાજ્ય સરકારે કોર્ટમાં લખીમપુર ખેરી હિંસાને ગંભીર અપરાધ ગણાવ્યો હતો. સરકાર વતી કોર્ટમાં કહેવામાં આવ્યું હતું કે, જ્યાં સુધી આ કેસમાં ટ્રાયલ પૂર્ણ ન થાય ત્યાં સુધી આશિષ મિશ્રાને જેલમાંથી જામીન પર છોડવામાં ન આવે. આશિષ મિશ્રા કેન્દ્રીય ગૃહ રાજ્ય મંત્રી અજય મિશ્રા ટેનીના પુત્ર છે. 3 નવેમ્બરના રોજ દાખલ કરવામાં આવેલા સોગંદનામામાં યુપી સરકારે કહ્યું હતું કે, ગુનાની ગંભીરતા અને અરજદારની ગુનાહિત પૃષ્ઠભૂમિ અને તેની અસરને ધ્યાનમાં રાખીને તે યોગ્ય રહેશે કે, ટ્રાયલ પૂર્ણ થાય ત્યાં સુધી જેલમાંથી મુક્ત કરવામાં ન આવે.
યુપી સરકારે સ્પષ્ટપણે કહ્યું હતું કે, આ કેસમાં જ્યાં સુધી ટ્રાયલ પૂર્ણ ન થાય અને આરોપ ઘડવામાં ન આવે ત્યાં સુધી આશિષ મિશ્રાને જામીન ન આપવા જોઈએ. 26 જુલાઈના રોજ અલ્હાબાદ હાઈકોર્ટે આશિષ મિશ્રાને જામીન આપવાનો ઈન્કાર કરી દીધો હતો. હાઈકોર્ટના નિર્ણય સામે આશિષ મિશ્રાએ સુપ્રીમ કોર્ટમાં અરજી કરી છે. 3 ઓક્ટોબર 2021ના રોજ લખીમપુર ખેરીમાં ખેડૂતોના આંદોલન દરમિયાન હિંસા થઈ હતી. આ દરમિયાન આશિષ મિશ્રાના પિતાની કાર દ્વારા 4 ખેડૂતો અને એક પત્રકારને કચડી નાખવામાં આવ્યા હોવાનો આરોપ છે. આ ઘટના બાદ હિંસા ફાટી નીકળી હતી જેમાં અન્ય 3 લોકોના પણ મોત થયા હતા.
