- દેશમાં ગરમીને કારણે જનતા પરેશાન
- હજી પણ ગરમીથી રાહત મળવાના અણસાર નહી
- તાપમાન હજુ વધી શકે તેવી હવામાન વિભાગની આગાહી
ભારતના મોટાભાગના વિસ્તારો આ દિવસોમાં આકરી ગરમીથી પરેશાન થયા છે. ઉત્તર ભારતના મેદાની વિસ્તારો છેલ્લા પાંચ દિવસથી તીવ્ર ગરમીની ચપેટમાં આવ્યા છે ત્યારે હવામાન વિભાગે ગરમીને લઇને રાહત મળે તેવી કોઇ શક્યતા વ્યક્ત કરી નથી.
આ રાજ્યોમાં રેડ એલર્ટ
હવામાન વિભાગે આગામી પાંચ દિવસ માટે હીટ વેવનું રેડ એલર્ટ જાહેર કર્યું છે. જે રાજ્યો માટે રેડ એલર્ટ જાહેર કરવામાં આવ્યું છે તેમાં પંજાબ, હરિયાણા, દિલ્હી, રાજસ્થાન, ઉત્તર પ્રદેશ, ગુજરાત અને ઉત્તર પશ્ચિમ મધ્ય પ્રદેશનો સમાવેશ થાય છે.
જનજીવન પ્રભાવિત
હવામાન વિભાગે તીવ્ર ગરમીને લીધે વૃદ્ધો, બાળકો અને બીમાર લોકોએ ખાસ ધ્યાન રાખવા જણાવ્યું છે. નીચલા પહાડી વિસ્તારોમાં પણ તીવ્ર ગરમી રહેશે. મંગળવારે દેશના ઘણા વિસ્તારોમાં મહત્તમ તાપમાન 45 ડિગ્રી સેલ્સિયસથી વધુ હતું. જેમાં રાજસ્થાન, હરિયાણા, દિલ્હી, ચંદીગઢ અને ઉત્તર પ્રદેશના ઘણા વિસ્તારો સામેલ છે. ગરમીના કારણે આ વિસ્તારોમાં સામાન્ય જનજીવન ખરાબ રીતે પ્રભાવિત થયું હતું. ગુજરાતના અનેક વિસ્તારોમાં કાળઝાળ ગરમી તેમજ ભેજના કારણે સ્થિતિ વધુ જોખમી બની રહી છે. મંગળવારે હરિયાણાના સિરસામાં મહત્તમ તાપમાન 47.8 ડિગ્રી સેલ્સિયસ નોંધાયું હતું, જે દેશમાં સૌથી વધુ છે.
અહીં 45 ડિગ્રી તાપમાન
રાજસ્થાન, હરિયાણા, દિલ્હી, ચંદીગઢ અને ઉત્તર પ્રદેશના ઘણા ભાગોમાં મંગળવારે મહત્તમ તાપમાન 45 ડિગ્રી સેલ્સિયસથી ઉપર રહ્યું હતું. ગુજરાતમાં લોકો ભારે ગરમીને કારણે ત્રાહિમામ પોકારી ઉઠ્યા છે.
ગરમીથી ક્યારે મળશે રાહત ?
હવામાન વિભાગે જણાવ્યું હતું કે હાલ આકરી ગરમીમાંથી રાહત મળવાની કોઈ શક્યતા નથી. આગામી ચારથી પાંચ દિવસમાં મહત્તમ અને લઘુત્તમ તાપમાનમાં બેથી ત્રણ ડિગ્રીનો વધારો થઈ શકે છે. રાજસ્થાનમાં તાપમાનમાં વધુ વધારો થયો છે અને ઝુંઝુનુમાં મંગળવારે 47.2 ડિગ્રી સેલ્સિયસ સાથે રાજ્યનું સૌથી ગરમ સ્થળ હતું.
