Weather Update : હાડ થીજાવતી ઠંડી પડશે, 10 રાજ્યમાં ગાઢ ધુમ્મસ છવાશે

દેશ ભરમાં ઠંડી પડી રહી છે ડિસેમ્બર મહિનો શરૂ થવા જઈ રહ્યો છે અને શિયાળો બરાબરનો જામ્યો છે. સમગ્ર ઉત્તર ભારતમાં ગાઢ ધુમ્મસની ચાદર સવાર સવારમાં છવાઇ જાય છે. દિલ્હી-એનસીઆરમાં પણ તાપમાનમાં ઘટાડો થયો છે. દિલ્હી અને નોઈડા સિવાય ઉત્તર ભારતના અન્ય રાજ્યોમાં સવાર-સાંજ ગાઢ ધુમ્મસ છવાયું છે.

આવતીકાલે હિમાચલ પ્રદેશ, પંજાબ, હરિયાણા, ચંદીગઢ અને બિહારના વિવિધ વિસ્તારોમાં ગાઢ ધુમ્મસ રહેશે.

જમ્મુ કાશ્મીર અને હિમાચલ પ્રદેશમાં હિમવર્ષા થઈ રહી છે. ગુરુવારે પણ કાશ્મીરમાં સારી હિમવર્ષા થઈ હતી. આ હિમવર્ષાની અસર મેદાની રાજ્યોમાં જોવા મળી હતી. પહાડો પરથી આવતા ઠંડા પવનોને કારણે ઉત્તર ભારતના તમામ રાજ્યોમાં તાપમાનમાં ઘટાડો થયો હતો અને ઠંડીનો અહેસાસ કરાવ્યો હતો. આગામી 2 દિવસમાં હવામાનમાં ઝડપથી ફેરફાર થશે. ચાલો જાણીએ કે દેશભરમાં ઠંડીના કારણે કેવું છે હવામાન?

આગામી 2 દિવસ સુધી ગાઢ ધુમ્મસ આ રાજ્યોને આવરી લેશે

હવામાન વિભાગના જણાવ્યા મુજબ, આજે અને આવતીકાલે હિમાચલ પ્રદેશ, પંજાબ, હરિયાણા, ચંદીગઢ અને બિહારના વિવિધ વિસ્તારોમાં ગાઢ ધુમ્મસ રહેશે. આગામી 5 દિવસ એટલે કે 4 ડિસેમ્બર સુધી હવામાન આવું જ રહેશે. ઉત્તર પ્રદેશ, બિહાર, ઝારખંડ, રાજસ્થાનમાં શિયાળાની સારી શરૂઆત થઈ ગઈ છે. ગુરુવારે દિલ્હીનું લઘુત્તમ તાપમાન સિઝનનું સૌથી નીચું તાપમાન નોંધાયું હતું.

આ તાપમાન 10.1 ડિગ્રી સેલ્સિયસ નોંધાયું હતું. મહત્તમ તાપમાન 27 ડિગ્રી સેલ્સિયસ નોંધાયું હતું, જે સામાન્ય કરતાં એક ડિગ્રી વધુ હતું. આ રાજ્યોમાં આગામી 2 દિવસમાં ખૂબ જ ઠંડું વાતાવરણ રહેવાની શક્યતા છે. રાજધાની દિલ્હીમાં આગામી 5 દિવસ સુધી ગાઢ ધુમ્મસનું એલર્ટ રહેશે. દિલ્હીમાં આગામી 2 દિવસ સુધી મહત્તમ તાપમાન 26 થી 28 ડિગ્રી રહેવાની સંભાવના છે. લઘુત્તમ તાપમાન 9 થી 10 ડિગ્રી વચ્ચે રહી શકે છે.

જમ્મુ-કાશ્મીર, હિમાચલ, ઉત્તરાખંડમાં હિમવર્ષા

ત્રણ પહાડી રાજ્યો જમ્મુ-કાશ્મીર, હિમાચલ પ્રદેશ અને ઉત્તરાખંડમાં આગામી 5 દિવસમાં 4 ડિસેમ્બર સુધી હિમવર્ષા થશે. હિમવર્ષાને કારણે આ રાજ્યોનું હવામાન એકદમ ઠંડુ, આહલાદક રહે છે. જમ્મુ-કાશ્મીરના ગુલમર્ગ અને કુપવાડા શહેરોમાં તાપમાનનો પારો માઈનસ થઈ શકે છે.

બાકીના શહેરોમાં લઘુત્તમ તાપમાન 9-10 ડિગ્રી રહેવાની સંભાવના છે. ઉત્તરાખંડ માટે ધુમ્મસની કોઈ ચેતવણી નથી, પરંતુ ઠંડા પવનોને કારણે રાજ્યના ઘણા શહેરોમાં તાપમાન માઈનસ થઈ શકે છે. હિમાચલ પ્રદેશમાં ઘણી જગ્યાએ ગાઢ ધુમ્મસ જોવા મળી શકે છે. કુફરી, કુલ્લુ, મનાલી, કસૌલ જેવા પહાડી વિસ્તારોમાં તાપમાનમાં 2 ડિગ્રીનો ઘટાડો થઈ શકે છે.