- હવામાન વિભાગે દિલ્હીમાં ભારે ગરમીને લઈને ઓરેન્જ એલર્ટ જાહેર કર્યું છે
- જમ્મુમાં પણ હીટ વેવ યથાવત, બિહારમાં ગરમીના કારણે 13ના મોત
- ગુજરાતમાં છેલ્લા ચાર દિવસથી દક્ષિણ-પશ્ચિમ ચોમાસું અટવાયું છે
દેશના મોટાભાગના વિસ્તારોમાં અંગ દઝાડતી ગરમી અને લૂ યથાવત છે. ઉત્તર પ્રદેશ, દિલ્હી, હરિયાણા અને પંજાબના મેદાની વિસ્તારો જ નહીં, હિમાચલ પ્રદેશ અને ઉત્તરાખંડના પર્વતીય રાજ્યોના મોટાભાગના જિલ્લાઓ પણ ગરમીની લપેટમાં છે. હવામાન વિભાગે આ બંને રાજ્યો માટે હીટ વેવ એલર્ટ જાહેર કર્યું છે.
આગામી ત્રણ દિવસ માટે ઓરેન્જ એલર્ટ જારી કરવામાં આવ્યું
રાજધાની દિલ્હીમાં કાળઝાળ ગરમીથી કોઈ રાહત મળી નથી અને આગામી ત્રણ દિવસ માટે ઓરેન્જ એલર્ટ જારી કરવામાં આવ્યું છે. હવામાન વિભાગના જણાવ્યા અનુસાર, શનિવારે દિલ્હીમાં મહત્તમ તાપમાન 44.6 ડિગ્રી સેલ્સિયસ નોંધાયું હતું, જે સિઝનની સરેરાશ કરતા છ ડિગ્રી વધુ છે.
રવિવારે પણ આવું જ વાતાવરણ રહેવાની શક્યતા છે
રવિવારે પણ આવું જ વાતાવરણ રહેવાની શક્યતા છે. પંજાબમાં 18 જૂન સુધી હીટ વેવ અને ભારે ગરમીની સ્થિતિ યથાવત રહેવાની ધારણા છે. શનિવારે અબોહરમાં સૌથી વધુ તાપમાન 47.1 ડિગ્રી સેલ્સિયસ હતું, જે સામાન્ય કરતાં 8.5 ડિગ્રી વધુ હતું.
જમ્મુમાં પણ ગરમી યથાવત છે
હિમાચલ પ્રદેશના હમીરપુરના નેરીમાં શુક્રવારે મહત્તમ તાપમાન 46.7 ડિગ્રી સેલ્સિયસ હતું, જે રાજ્યમાં અત્યાર સુધીનું સૌથી વધુ તાપમાન છે. ઉત્તરાખંડના દેહરાદૂનનું મહત્તમ તાપમાન 42.4 ડિગ્રી સેલ્સિયસ નોંધાયું હતું. જમ્મુમાં પણ ગરમીનું મોજુ યથાવત છે. જમ્મુ વિભાગમાં સૌથી વધુ તાપમાન કઠુઆ જિલ્લામાં 46.5 ડિગ્રી નોંધાયું હતું. હવામાન વિભાગના ડાયરેક્ટર ડૉ.મુખ્તારના જણાવ્યા અનુસાર જમ્મુમાં 20 જૂન સુધી ગરમી રહેશે.
બિહારમાં ગરમીના કારણે 13 લોકોના મોત થયા છે
બિહારમાં આકરી ગરમીના કારણે શનિવારે ત્રણ જિલ્લામાં 13 લોકોના મોત થયા છે. મૃતકોમાં ઔરંગાબાદ જિલ્લાના પાંચ, સારણ અને ગયાના ત્રણ-ત્રણ અને રોહતાસ અને ભોજપુરના એક-એકનો સમાવેશ થાય છે. શનિવારે રાજ્યમાં સૌથી વધુ તાપમાન બક્સરમાં 46.0 ડિગ્રી સેલ્સિયસ હતું. જ્યારે ગયા, દેહરી (સાસારામ) અને ભોજપુરમાં મહત્તમ તાપમાન 45.5 ડિગ્રી સેલ્સિયસ નોંધાયું હતું.
