- CAAને લઇને વિપક્ષો કરી રહ્યાં છે વિરોધ
- કેન્દ્રીય ગૃહમંત્રી અમિત શાહે આ મુદ્દે કરી સ્પષ્ટતા
- અમિત શાહે CAAનો વિરોધ કરવાનું કારણ સમજાવવાની અપીલ
CAA એટલે કે નાગરિકતા સંશોધન કાયદો લાગુ થયા બાદ કેન્દ્રીય ગૃહમંત્રી અમિત શાહે તેના પર ખુલીને વાત કરી હતી. તેમણે સ્પષ્ટ કર્યું છે કે કાયદો 'મુસ્લિમ વિરોધી' નથી. તેમણે વાયનાડના સાંસદ અને કોંગ્રેસના પૂર્વ રાષ્ટ્રીય અધ્યક્ષ રાહુલ ગાંધીને પણ CAAનો વિરોધ કરવાનું કારણ સમજાવવાની અપીલ કરી છે. ઉલ્લેખનીય છે કે કોંગ્રેસે CAA પર ગંભીર સવાલ ઉઠાવ્યા હતા.
રાહુલ ગાંધીનો ઇન્ટરવ્યુ કરો- અમિતશાહ
ન્યૂઝ એજન્સી ANIને આપેલા ઈન્ટરવ્યુમાં અમિત શાહે રાહુલ ગાંધીને સ્ટેજ પર આવવા અને CAA પર ખુલ્લેઆમ પોતાનો અભિપ્રાય વ્યક્ત કરવાનો પડકાર ફેંક્યો છે. તેમણે કહ્યું, 'હું તમને વિનંતી કરું છું કે આ મુદ્દે રાહુલ ગાંધીનો વિગતવાર ઇન્ટરવ્યુ કરો અને સામાન્ય જનતાને CAAનો વિરોધ કરવાનું કારણ સમજાવો. રાજકારણમાં, તમારા નિર્ણયો પર સ્પષ્ટતા આપવાની જવાબદારી તમારી છે.' તેમણે આગળ કહ્યું, 'જો CAAનો નિર્ણય મારી સરકાર દ્વારા લેવામાં આવ્યો છે, તો મારે મારી પાર્ટીનો અભિપ્રાય સમજાવવો પડશે. એ જ રીતે રાહુલ ગાંધીએ પણ સમજાવવું જોઈએ કે તેઓ આ કાયદાનો વિરોધ કેમ કરી રહ્યા છે.
વિપક્ષના વિરોધને લઇને આપ્યો જવાબ
કોંગ્રેસના વરિષ્ઠ નેતા જયરામ રમેશે કાયદાના અમલના સમય પર સવાલ ઉઠાવ્યા છે. તેમણે એવો પણ આક્ષેપ કર્યો હતો કે આ એક વિવાદાસ્પદ કાયદો છે, કારણ કે નાગરિકતા ક્યારેય ધર્મના આધારે નથી મળી. તેના પર અમિત શાહે કહ્યું હતું કે 'રાહુલ ગાંધી, મમતા કે કેજરીવાલ સહિત તમામ વિપક્ષી પાર્ટીઓ જૂઠાણાની રાજનીતિ કરી રહી છે. આવી સ્થિતિમાં સમયનો પ્રશ્ન જ ઊભો થતો નથી. ભાજપે તેના 2019ના ઢંઢેરામાં સ્પષ્ટ કર્યું હતું કે તે CAA લાવશે અને શરણાર્થીઓને ભારતીય નાગરિકતા આપશે. ભાજપનો એજન્ડા સ્પષ્ટ છે અને તે વચન મુજબ 2019માં બંને ગૃહોમાં બિલ પસાર કરવામાં આવ્યું હતું. કોવિડને કારણે તેમાં વિલંબ થયો હતો. ચૂંટણીમાં જનાદેશ મળતા પહેલા જ ભાજપનો એજન્ડા સ્પષ્ટ હતો. તેમણે કહ્યું હતું કે, 'નિયમો હવે ઔપચારિકતા બની ગયા છે. સમય, રાજકીય લાભ કે નુકસાનનો પ્રશ્ન નથી. હવે વિપક્ષ તુષ્ટિકરણની રાજનીતિ કરીને પોતાની વોટબેંકને એક કરવા માંગે છે. હું તેઓને વિનંતી કરું છું કે તેઓ ખુલ્લા પડી ગયા છે. CAA સમગ્ર દેશ માટે કાયદો છે અને મેં ચાર વર્ષમાં 41 વખત પુનરોચ્ચાર કર્યો છે કે તે વાસ્તવિકતા બનશે.
