યુટ્યુબર જ્યોતિ મલ્હોત્રાની ધરપકડ કરવામાં આવી છે. તેમના સહિત 6 લોકો અરેસ્ટ થયા છે. જ્યોતિ પર પાકિસ્તાન માટે જાસૂસી કરવાનો આરોપ છે. રાષ્ટ્ર વિરોધી પ્રવૃત્તિઓ અને પાકિસ્તાનની ગુપ્તચર એજન્સીઓ સાથેના સંબંધોના આરોપસર ધરપકડ કરવામાં આવી છે. જ્યોતિ મલ્હોત્રા "ટ્રાવેલ વિથ" નામની યુટ્યુબ ચેનલ ચલાવે છે. પાકિસ્તાનની મુલાકાત દરમિયાન તે દેશની ગુપ્તચર એજન્સી ISIના એજન્ટોના સંપર્કમાં આવી હતી.


એન્ક્રિપ્ટેડ એપ્સથી ચાલતી હતી વાતચીત

આ કેસમાં અત્યાર સુધીમાં છ લોકોની ધરપકડ કરવામાં આવી છે. જે હરિયાણા અને પંજાબના અલગ અલગ ભાગોના છે. જ્યોતિ મલ્હોત્રાએ વર્ષ 2023માં પાકિસ્તાનની મુલાકાત લીધી હતી. તેમણે કમિશન દ્વારા વિઝા મેળવીને આ યાત્રા કરી હતી. આ સમય દરમિયાન, જ્યોતિ પાકિસ્તાન હાઈ કમિશનના કર્મચારી એહસાન-ઉર-રહીમ ઉર્ફે દાનિશને મળી હતી. જેની સાથે તેણીના ગાઢ સંબંધો વિકસ્યા હતા. દાનિશ દ્વારા, જ્યોતિનો પરિચય પાકિસ્તાની ગુપ્તચર એજન્સીના અન્ય એજન્ટો સાથે થયો હતો. જેમાં અલી અહસાન અને શાકિર ઉર્ફે રાણા શાહબાઝનો સમાવેશ થાય છે. જેનું નામ તેણીએ તેના ફોનમાં 'જટ્ટ રંધાવા' તરીકે સેવ કર્યું હતું. જ્યોતિ વોટ્સએપ, ટેલિગ્રામ અને સ્નેપચેટ જેવા એન્ક્રિપ્ટેડ પ્લેટફોર્મ દ્વારા આ એજન્ટોના સંપર્કમાં રહી. તે સોશિયલ મીડિયા પર પાકિસ્તાનની તરફેણમાં સકારાત્મક છબી રજૂ કરી રહી હતી એટલું જ નહીં, પરંતુ સંવેદનશીલ માહિતી પણ શેર કરી રહી હતી.

જાસૂસી નેટવર્કનો મોટો ખુલાસો

આ ફક્ત જ્યોતિ પૂરતો મર્યાદિત કેસ નથી. પરંતુ તેણે એક મોટા નેટવર્કનો પર્દાફાશ કર્યો છે. જેમાં પંજાબ અને હરિયાણાના અનેક જિલ્લાઓના લોકોનો સમાવેશ થાય છે. આ બધા આરોપીઓ કાં તો પાકિસ્તાની એજન્ટોના સંપર્કમાં હતા અથવા તેમના માટે નાણાકીય વ્યવહારોના માધ્યમ તરીકે કામ કરી રહ્યા હતા. આ કેસમાં પંજાબના માલેરકોટલાથી ધરપકડ કરવામાં આવી છે. ધરપકડ કરાયેલા આરોપીઓમાં 32 વર્ષીય ગઝાલાનો પણ સમાવેશ થાય છે. જે દાનિશ સાથે નાણાકીય વ્યવહારોમાં સામેલ હતી અને તેને વિઝા પ્રક્રિયામાં મદદ કરતી હતી. આ ઉપરાંત યામીન મોહમ્મદ પણ સામેલ છે. જે હવાલા અને અન્ય માધ્યમથી પૈસા મોકલવામાં દાનિશને મદદ કરતો હતો. આ દરમિયાન દેવિન્દર સિંહ ધિલ્લોનની હરિયાણાના કૈથલથી ધરપકડ કરવામાં આવી છે. પાકિસ્તાનની મુલાકાત દરમિયાન તે સંપર્કમાં આવ્યો હતો, તેણે પાકિસ્તાની એજન્ટોને પટિયાલા કેન્ટોનમેન્ટના વીડિયો મોકલ્યા હતા. 

  • Follow us on: