વિશ્વભરના ખગોળીય ઘટનાઓમાં રસ ધરાવનારાઓ માટે વર્ષ 2027 ખૂબ જ ખાસ બનવાનું છે. 2 ઓગસ્ટ 2027ના રોજ એક પૂર્ણ સૂર્યગ્રહણ લાગશે. કહેવામાં આવી રહ્યું છે કે 21મી સદીનું આ સૌથી લાંબું સૂર્યગ્રહણ હશે. અમેરિકાની અંતરિક્ષ એજન્સી નાસાએ ગ્રહણના માર્ગ વિશે માહિતી આપી છે. નાસાના જણાવ્યા અનુસાર, ગ્રહણનો પૂર્ણતા માર્ગ દક્ષિણ યુરોપ, ઉત્તર આફ્રિકા અને મધ્ય પૂર્વના કેટલાક વિસ્તારોમાં જોવા મળશે.
ભારતમાં જોવા મળશે આંશિક સૂર્ય ગ્રહણ
આ ગ્રહણની સૌથી મોટી ખાસિયત તેની અવધિ છે. આ ગ્રહણ 6 મિનિટ 23 સેકન્ડ સુધી રહેશે. આ લાંબી અવધિના કારણે તે જમીન પરથી જોવામાં આવતાં સૌથી લાંબા પૂર્ણ સૂર્યગ્રહણોમાંનું એક ગણાય છે. ખગોળ વૈજ્ઞાનિકોના મતે, આવી અવધિનું ગ્રહણ હવે વર્ષ 2114 સુધી ફરીથી જોવા મળશે નહીં. એટલે કે, હાલ જીવિત લોકો પોતાના જીવનકાળમાં આવું લાંબું ગ્રહણ કદાચ ફરી નહીં જોઈ શકે. કહેવામાં આવે છે કે આ સદીનું સૌથી લાંબું ગ્રહણ હશે, પરંતુ ભારતમાંથી તે પૂર્ણ રૂપે જોવા મળશે નહીં. ભારતમાં માત્ર આંશિક સૂર્યગ્રહણ જોવા મળશે, એટલે કે ચંદ્ર સૂર્યનો માત્ર એક ભાગ જ ઢાંકી શકશે. ખગોળવિદો માટે બ્રહ્માંડના રહસ્યો સમજવાનો આ એક ખૂબ જ ખાસ મોકો હશે.
ગ્રહણ સમયે શું થશે?
પૂર્ણ સૂર્યગ્રહણ દરમિયાન ચંદ્ર સૂર્યને સંપૂર્ણ રીતે ઢાંકી લે છે. આકાશમાં સાંજ જેવી સ્થિતિ સર્જાય છે. લાંબા સમય સુધી સૂર્યનો કોરોના દેખાવાથી ગ્રહણવાળા વિસ્તારોમાં પૃથ્વીનું તાપમાન ઘટી જાય છે. દિવસે અચાનક અંધકાર થવાથી પ્રાણીઓ અજીબ વર્તન કરતા જોવા મળે છે. આ સમયે આકાશમાં તારાઓ અને દૂર આવેલા ગ્રહો પણ નજરે પડે છે. ચંદ્રની છાયા પાસે સૂર્યનો કોરોના તેજસ્વી રીતે ચમકતો દેખાય છે.
સૂર્યગ્રહણ કેમ લાગે છે?
પૃથ્વીનો સૌથી નજીકનો તારો સૂર્ય પોતાના સ્થાન પર સ્થિર છે અને પૃથ્વી તેની પરિક્રમા કરે છે. પૃથ્વીની જેમ ચંદ્ર પણ સૂર્યની પરિક્રમા કરે છે, પરંતુ તે પૃથ્વીની પણ પરિક્રમા કરે છે. કેટલીક વખત ચંદ્ર ફરતા ફરતા સૂર્ય અને પૃથ્વી વચ્ચે આવી જાય છે. ત્યારે તે થોડા સમય માટે સૂર્યના પ્રકાશને રોકી દે છે, જેને સૂર્યગ્રહણ કહેવામાં આવે છે. આ દરમિયાન ચંદ્રની છાયા પૃથ્વી પર પડે છે.
