Nepal on Note Ban : નેપાળ જનારાઓ માટે ખુશખબરી, 10 વર્ષ બાદ નેપાળ સરકારે હટાવ્યો 500 અને 200 રૂપિયાની ભારતીય નોટો પરનો પ્રતિબંધ!

જો તમે નેપાળની યાત્રાનું આયોજન કરી રહ્યા છો અથવા વારંવાર મુલાકાત લેતા હોવ, તો આ સમાચાર એક મોટી ભેટ છે. છેલ્લા એક દાયકાથી, ભારતીય પ્રવાસીઓ અને ત્યાં કામ માટે જનારા લોકો માટે આ સૌથી મોટો માથાનો દુખાવો હતો જે દૂર થઈ ગયો છે. નેપાળ સરકારે ભારતીય ચલણ પરના નિયંત્રણો હળવા કર્યા છે, જેમાં 10 વર્ષ જૂનો પ્રતિબંધ હટાવવામાં આવ્યો છે. હવે, તમારે નેપાળની તમારી યાત્રા દરમિયાન નોટો બદલવાની કે નાના પૈસા એકત્રિત કરવાની ઝંઝટનો સામનો નહીં કરવો પડે. કારણ કે નેપાળ સરકારે ભારતીય 200 અને 500 રૂપિયાની નોટોને લીલી ઝંડી આપી દીધી છે.

આ શરત સાથે મળી છે મંજૂરી

સોમવારે નેપાળ કેબિનેટની એક મહત્વપૂર્ણ બેઠક યોજાઈ હતી, જેમાં આ ઐતિહાસિક નિર્ણય લેવામાં આવ્યો હતો. સરકારે નિર્ણય લીધો છે કે ભારતીય અને નેપાળી નાગરિકો હવે મુસાફરી દરમિયાન 200 અને 500 રૂપિયાની નોટો સાથે રાખી શકશે. આ નિર્ણય ત્યારે આવ્યો છે જ્યારે રિઝર્વ બેંક ઓફ ઈન્ડિયા (RBI) એ તેના નિયમોમાં ફેરફાર કર્યો છે અને પડોશી દેશોમાં મુસાફરી માટે મોટી ચલણ લઈ જવાની મંજૂરી આપી છે.

જોકે, પ્રવાસીઓએ ધ્યાનમાં રાખવું જોઈએ કે સરકારે આ મંજૂરી શરતો સાથે આપી છે. જે મુજબ તમે આ મોટા મૂલ્યની નોટોમાં વધુમાં વધુ 25,000 રૂપિયા જ લઈ જઈ શકો છો. આ પગલું માત્ર મુસાફરીને સરળ બનાવશે એવું નથી પરંતુ બંને દેશો વચ્ચેના વેપાર સંબંધોને પણ વેગ આપશો.

માર્કેટમાં ફરી જોવા મળશે ચમક

આ ચલણ પ્રતિબંધે નેપાળના અર્થતંત્રને, ખાસ કરીને તેના પર્યટન ક્ષેત્રને ખોરવી નાખ્યું હતુ. છેલ્લા કેટલાક વર્ષોમાં સરહદી બજારોમાં કેસિનો, મોટી હોટલો અને વેપારીઓને નોંધપાત્ર નુકસાન થયું છે. ભારતના પ્રવાસીઓ ઘણીવાર મોટી ચલણી નોટો સાથે લાવી શકતા ન હતા, જેના કારણે તેમની ખર્ચ કરવાની ક્ષમતા ઘટી ગઈ હતી.

ઘણી વખત, ભારતીય પ્રવાસીઓને ચલણના નિયમો વિશે જાણકારીના અભાવે દંડ ભરવાની ફરજ પડતી હતી, જેના કારણે તેમની સફરની મજા બગડી ગઈ હતી. હવે આ છૂટછાટ પછી, એવી અપેક્ષા રાખવામાં આવે છે કે નેપાળના હોસ્પિટાલિટી ઈન્ડસ્ટ્રીને મોટો વેગ મળશે અને ભારતીય પ્રવાસીઓ ત્યાં જઈ શકશે અને મુક્તપણે ખર્ચ કરી શકશે.

માત્ર હવે સત્તાવાર ગેજેટની રાહ

નેપાળ રાષ્ટ્ર બેંક (NRB) ના પ્રવક્તા ગુરુ પ્રસાદ પૌડેલે સ્પષ્ટતા કરી કે સરકારે આ નિર્ણય લીધો છે અને હવે ફક્ત ઔપચારિકતાઓ બાકી છે. આ નિર્ણય નેપાળ ગેઝેટમાં પ્રકાશિત થતાંની સાથે જ, કેન્દ્રીય બેંક તાત્કાલિક એક પરિપત્ર જારી કરશે. આ પરિપત્ર જારી થતાં, 200 અને 500 રૂપિયાની નોટો રાખવી એ સંપૂર્ણપણે કાયદેસર બની જશે.

આ પણ વાંચો: UNSC: જમ્મુ કાશ્મીર અને લદ્દાખ અમારુ હતું, છે અને રહેશે..UNમાં ભારતે પાકિસ્તાનને સંભળાવી દીધું