આપણા શરીરની ત્વચા પર વિવિધ સ્થાન પર નસ દેખાય છે. ખાસ કરીને આપણા પગમાં લીલા અને સાધારણ જાંબલી રંગની નસો દેખાય છે. આ નસને વેરિકોઝ વેઈન પણ કહે છે. વેરિકોઝ વેઈન દેખાવું સામાન્ય બાબત છે પરંતુ કેટલીક વખત તેમાં વારંવાર થતી ખંજવાળ અને દુઃખાવો અસ્વસ્થતા પેદા કરે છે. ત્વચા પર દેખાતી આ નસ (વેરિકોઝ વેઈન )નો રંગ લીલા અને જાંબલી રંગનો કેમ છે તેને લઈને આપણા મનમાં સવાલ પેદા થાય છે. કારણ કે શરીરમાં લાલ રંગનું લોહી સંચાર કરે છે તો પછી કેમ આ નસનો રંગ લીલો અને જાંબલી છે.
એક અભ્યાસ મુજબ, જો તમારા પગ ખૂબ ઠંડા હોય અને તમને ભારેપણું લાગે, તો તેનું કારણ નસોમાં સોજો હોઈ શકે છે, જેને તબીબી ભાષામાં વેરિકોઝ નસો કહેવામાં આવે છે. વેરિકોઝ નસો એટલે પગમાં ફૂલેલી અને સોજી ગયેલી નસો. જ્યારે પગની નસો યોગ્ય રીતે કામ કરવામાં નિષ્ફળ જાય છે ત્યારે વેરિકોઝ નસો થાય છે. વેરિકોઝ વેઈન લોહી હૃદય તરફ પાછું વહેવાને બદલે, એક ભાગમાં જમા થવા લાગે છે, જેના કારણે તે ભાગમાં દબાણ વધે છે અને નસો વળી જાય છે અને ફૂલી જાય છે અને ત્વચાની ઉપર દેખાય છે.
જો તમે પણ શરીરમાં જોવા મળતી લીલા રંગની નસને લઈને મૂંઝવણ અનુભવો છો તો તેની પાછળનું રસપ્રદ વિજ્ઞાન જાણો.
લોહીનો રંગ લાલ કેમ ?
આપણા લોહીમાં હિમોગ્લોબિન નામનું પ્રોટીન હોય છે, જે શરીરના દરેક ભાગમાં ઓક્સિજન પહોંચાડવાનું કામ કરે છે. જ્યારે આ હિમોગ્લોબિન ઓક્સિજન સાથે જોડાય છે, ત્યારે તે તેજસ્વી લાલ થઈ જાય છે - આ તે લોહી છે જે આપણા શરીરમાં વહે છે.
નસો વાદળી કેમ ?
આ એક ભ્રમ છે જે આપણી આંખો અને મગજની સંયુક્ત યુક્તિનું પરિણામ છે. વાસ્તવમાં, નસો વાદળી કે લીલા રંગની નથી હોતી, તે આપણને એવી જ દેખાય છે. આમ થવા પાછળનું વિજ્ઞાન કહે છે કે જ્યારે પ્રકાશ આપણી ત્વચા પર પડે છે, ત્યારે તે વિવિધ રંગોમાં વિભાજિત થઈ જાય છે. લાલ રંગની તરંગ લંબાઇ લાંબી હોય છે અને તે ત્વચામાં ઊંડે સુધી પ્રવેશી શકે છે. વાદળી તરંગો ઓછી ઊંડાઈ સુધી પ્રવાસ કરે છે અને ઝડપથી પરાવર્તિત થાય છે. આ કારણે, આપણી આંખો મોટે ભાગે વાદળી તરંગોને પકડે છે, અને આપણે નસોને વાદળી અથવા લીલા રંગમાં જોઈએ છીએ.
નોંધ: આ વિગતો વાચકોને વધારે વિગતો પુરી પાડવા માટે લખવામાં આવી છે, જો કે આ સંદર્ભે તજજ્ઞોની સલાહ લેવી પણ જરૂરી છે.
