મકર સંક્રાંતિના પર્વ પર જ્યાં એકબાજુ આકાશમાં પતંગોનો પેચ લડાઈ રહ્યો છે, ત્યારે બીજી બાજુ આ જ પતંગની દોરી નિર્દોષ રાહદારીઓ માટે જીવલેણ સાબિત થઈ રહી છે. ભાવનગરના ભરતનગર વિસ્તારમાં પતંગની દોરી વાગવાથી એક 16 વર્ષના કિશોરને ગંભીર ઇજાઓ પહોંચી હોવાની ઘટના સામે આવી છે. આ કિસ્સો ઉત્તરાયણના પર્વ પર લોકો માટે લાલબત્તી સમાન છે.
ટ્યુશન જતી વખતે બની
ઘટના મળતી માહિતી મુજબ, ભરતનગર શેત્રુંજય-2 સોસાયટીમાં રહેતા ચિરાગભાઈ ઉજૈનિયાનો 16 વર્ષના પુત્ર આજે બપોરના સમયે પોતાના ઘરેથી ભરતનગર બાપા સીતારામ ચોક વિસ્તારમાં ટ્યુશન જવા માટે નીકળ્યો હતો. આ કિશોર જ્યારે રસ્તા પરથી પસાર થઈ રહ્યો હતો, ત્યારે અચાનક પતંગની કાતિલ દોરી તેના ગળાના ભાગે આવી ગઈ હતી. દોરી એટલી ધારદાર હતી કે કિશોરના ગળાના ભાગે ગંભીર ઈજાઓ પહોંચી હતી અને તે લોહીલુહાણ હાલતમાં રસ્તા પર જ ફસડાઈ પડ્યો હતો.
