રસોઈ કરતી વખતે આપણે ઘણીવાર બટાકા કાપી લઈએ છીએ, પરંતુ જો તેનો તરત ઉપયોગ ન થાય તો તે થોડી જ વારમાં કાળા પડવા લાગે છે. આ સમસ્યાને કારણે ઘણી ગૃહિણીઓ તેમને ફેંકી દેવા મજબૂર બને છે. પરંતુ શું તમે જાણો છો કે કેટલીક સરળ ટિપ્સ અનુસરીને તમે બટાકાને કલાકો સુધી તાજા અને સફેદ રાખી શકો છો?
બટાકાને કાળા પડતા અટકાવવાની અસરકારક રીતો:
ઠંડા પાણીમાં પલાળી રાખો: જો તમે બટાકાને કાપી લીધા હોય, તો તેને તરત જ એક મોટા વાસણમાં પાણી ભરીને તેમાં ડૂબાડી દો. બટાકા સંપૂર્ણપણે પાણીમાં ડૂબેલા રહેવા જોઈએ, કારણ કે હવામાં સંપર્કમાં આવતા ભાગો જ જલ્દી કાળા પડે છે. ઓરડાના તાપમાને સામાન્ય પાણીમાં તમે તેમને ૧ થી ૨ કલાક માટે આરામથી રાખી શકો છો.
લીંબુ અને સરકાનો જાદુ: જો તમારે બટાકાને લાંબા સમય (લગભગ ૨૦ થી ૨૨ કલાક) સુધી સાચવવા હોય, તો એક વાસણમાં પાણી ભરી તેમાં એક લીંબુનો રસ અને એક ચમચી સરકો (Vinegar) ઉમેરો. આ મિશ્રણમાં બટાકાને પલાળીને વાસણને રેફ્રિજરેટરમાં મૂકી દો. આનાથી બટાકા બિલકુલ કાળા નહીં પડે.
ધ્યાનમાં રાખવાની ખાસ બાબતો:
બટાકાને પાણીમાંથી કાઢ્યા બાદ સીધા રસોઈમાં વાપરવાને બદલે, તેને સુતરાઉ કપડાથી લૂછી લો જેથી વધારાનું પાણી દૂર થઈ જાય. વધુમાં, હંમેશા સ્ટીલની છરીનો ઉપયોગ કરવો; લોખંડની છરીથી કાપવાથી બટાકામાં કાળા ડાઘ ઝડપથી દેખાય છે. સાથે જ, યાદ રાખો કે બટાકાને ઓરડાના તાપમાને પાણીમાં ખૂબ લાંબો સમય ન રાખવા, નહીંતર તેમાંથી દુર્ગંધ આવી શકે છે. આ નાની-નાની સાવચેતીઓ તમારી રસોઈને સરળ બનાવશે અને ખોરાકનો બગાડ અટકાવવામાં પણ મદદ કરશે. તો હવે જ્યારે પણ વધુ બટાકા કપાઈ જાય, ત્યારે આ ઉપાયો અજમાવવાનું ભૂલતા નહીં!
આ પણ વાંચોઃ Digital detox : એક મહિનો સ્માર્ટફોનથી દૂર રહેશો તો શરીરમાં થશે આ અદભૂત ફેરફારો!
