સામાન્ય રીતે એવું માનવામાં આવે છે કે નિયમિત કસરત કરવી, જીમમાં જવું અથવા ક્રિકેટ જેવી રમતો રમવી સ્વાસ્થ્ય માટે ખૂબ જ લાભદાયક છે અને તેનાથી હૃદયની બીમારીઓનું જોખમ ઘટે છે. પરંતુ, છેલ્લા કેટલાક સમયથી સોશિયલ મીડિયા અને સમાચારોમાં એવી ઘટનાઓ સામે આવે છે જ્યાં યુવાનો કે તંદુરસ્ત દેખાતા લોકોને રમતા કે કસરત કરતી વખતે અચાનક હાર્ટ એટેક આવી જાય છે. આ પ્રકારના કિસ્સાઓ લોકોને ચિંતામાં મૂકે છે કે આખરે શારીરિક શ્રમ હૃદય પર આટલો ભારે કેમ પડી શકે છે?

શારીરિક પ્રવૃત્તિ વખતે ઓક્સિજનની જરૂર વધારે

જ્યારે આપણે કોઈ સખત શારીરિક પ્રવૃત્તિ કે કસરત કરીએ છીએ, ત્યારે શરીરને વધુ ઓક્સિજનની જરૂર પડે છે. આ જરૂરિયાત પૂરી કરવા માટે હૃદયના ધબકારા વધી જાય છે અને રક્ત પ્રવાહ ઝડપી બને છે. જો વ્યક્તિ સંપૂર્ણપણે સ્વસ્થ હોય, તો આ એક સામાન્ય પ્રક્રિયા છે. પરંતુ સમસ્યા ત્યારે સર્જાય છે જ્યારે વ્યક્તિને પહેલેથી જ હૃદય સંબંધિત કોઈ ગુપ્ત બીમારી, નસોમાં અવરોધ (Blockage) અથવા કોઈ આનુવંશિક હૃદયરોગ હોય, જેની તેને ખુદને પણ ખબર ન હોય. આવા કિસ્સાઓમાં અતિશય શ્રમ કે તીવ્ર કસરત હૃદય પર અચાનક મોટો બોજ નાખે છે, જે ગંભીર પરિણામો તરફ દોરી શકે છે.

સામાન્ય થાકને લોકો અવગણવાની કરે છે ભૂલ

આ ઉપરાંત, જે લોકો લાંબા સમયના અંતરાલ પછી અચાનક ભારે વજન ઉપાડવા કે તીવ્ર કસરત શરૂ કરી દે છે, તેમનું શરીર તે સ્તરના પરિશ્રમ માટે ટેવાયેલું હોતું નથી. તેથી નિષ્ણાતો હંમેશા ધીમે-ધીમે કસરત શરૂ કરવાની સલાહ આપે છે. જો કસરત કે રમત દરમિયાન છાતીમાં દુખાવો, અતિશય દબાણ, શ્વાસ લેવામાં તકલીફ, અચાનક ચક્કર આવવા, બેહોશ થઈ જવું કે અસામાન્ય રીતે ધબકારા વધવા જેવા લક્ષણો જણાય, તો તેને સામાન્ય થાક ગણીને ક્યારેય અવગણવા જોઈએ નહીં.

શું રમતો રમવાનું બંધ કરવું જોઇએ?

હાર્ટ એટેકના આવા બનાવો જોઈને કસરત કે રમતો રમવાનું સંપૂર્ણપણે બંધ કરી દેવું યોગ્ય નથી. હૃદયને સ્વસ્થ રાખવા માટે શારીરિક પ્રવૃત્તિ જરૂરી છે, પરંતુ તે તમારી ઉંમર, ફિટનેસ અને સ્વાસ્થ્યની સ્થિતિને અનુરૂપ હોવી જોઈએ. શરીરના સંકેતોને ઓળખીને અને ક્ષમતા મુજબ કસરત કરવાથી આપણે આવી ગંભીર દુર્ઘટનાઓથી બચી શકીએ છીએ.

આ પણ વાંચોઃ Surat થી ચેન્નાઈ હવે માત્ર 16 કલાકમાં! નવો એક્સપ્રેસ વે 5 રાજ્યોને જોડશે