ઉનાળાની ગરમી અને પરસેવાને કારણે ઘણીવાર શરીરમાંથી દુર્ગંધ આવવાની સમસ્યા રહે છે. આનાથી બચવા માટે આપણે મોંઘા પરફ્યુમ કે ડિઓડોરન્ટનો ઉપયોગ કરીએ છીએ, પરંતુ મોટાભાગના લોકોની ફરિયાદ હોય છે કે ઘરની બહાર નીકળ્યાના એકાદ કલાકમાં જ સુગંધ ગાયબ થઈ જાય છે. જો તમારી સાથે પણ આવું થતું હોય, તો સમસ્યા તમારા પરફ્યુમમાં નહીં પણ તેને લગાવવાની પદ્ધતિમાં છે. પરફ્યુમને લાંબા સમય સુધી ટકાવી રાખવા માટે તેને શરીરના 'પલ્સ પોઈન્ટ્સ' પર લગાવવું ખૂબ જ જરૂરી છે. ચાલો જાણીએ તે કયા છુપાયેલા બિંદુઓ છે અને પરફ્યુમ લગાવતી વખતે કઈ ભૂલો ન કરવી જોઈએ.
આ 3 જગ્યાએ પરફ્યુમ લગાવવું સૌથી અસરકારક
1. કાનની પાછળનો ભાગ:
કાનની પાછળની ત્વચા ખૂબ જ પાતળી અને ગરમ હોય છે. જ્યારે તમે અહીં પરફ્યુમ લગાવો છો, ત્યારે તે લોહીના પ્રવાહની ગરમીને કારણે લાંબા સમય સુધી મહેકતું રહે છે. આ ભાગ ચહેરા અને વાળની નજીક હોવાથી જ્યારે તમે કોઈની સાથે વાત કરો છો, ત્યારે તેમને સતત હળવી અને મીઠી સુગંધનો અહેસાસ થાય છે.
2. ઘૂંટણની પાછળ:
આ સાંભળવામાં થોડું વિચિત્ર લાગશે, પરંતુ તે અત્યંત વૈજ્ઞાનિક છે. સુગંધ હંમેશા નીચેથી ઉપરની તરફ ગતિ કરે છે. ઘૂંટણની પાછળનો ભાગ ગરમ રહે છે, અને જ્યારે તમે ચાલો છો ત્યારે શરીરની હિલચાલ સાથે સુગંધ ધીમે-ધીમે ઉપરની તરફ ફેલાય છે. આ યુક્તિ તમારા આખા શરીરને લાંબા સમય સુધી તાજગી આપે છે.
3. ગરદન અને પલ્સ પોઈન્ટ:
ગરદનની આસપાસ પરફ્યુમ લગાવવાથી તે આખા શરીરના તાપમાન સાથે મળીને સુગંધને રિલીઝ કરતું રહે છે. આ ઉપરાંત કાંડા પર પણ તમે પરફ્યુમ લગાવી શકો છો.
સુગંધ ટકાવી રાખવા માટેના ખાસ નુસખાઓ
વેસેલિન અથવા મોઇશ્ચરાઇઝરનો ઉપયોગ: શુષ્ક ત્વચા પરફ્યુમને જલ્દી શોષી લે છે, જેના કારણે સુગંધ ઉડી જાય છે. પરફ્યુમ લગાવતા પહેલા તે જગ્યાએ થોડું વેસેલિન અથવા સુગંધ વગરનું લોશન લગાવો. તેલયુક્ત ત્વચા પર પરફ્યુમના અણુઓ લાંબો સમય ટકી રહે છે.
ક્યારેય ઘસશો નહીં: ઘણા લોકો કાંડા પર પરફ્યુમ છાંટીને તેને એકબીજા સાથે ઘસે છે. આ એક મોટી ભૂલ છે. ઘસવાથી પરફ્યુમના પરમાણુઓ તૂટી જાય છે અને તેની ટોપ નોટ્સ નાશ પામે છે, જેનાથી સુગંધ જલ્દી ઓછી થઈ જાય છે.
સ્નાન કર્યા પછી તરત જ: સ્નાન કર્યા પછી શરીરના છિદ્રો (pores) ખુલ્લા હોય છે અને ત્વચા થોડી ભેજવાળી હોય છે. આ સમયે પરફ્યુમ લગાવવાથી તે ત્વચામાં ઊંડે સુધી ઉતરે છે અને લાંબો સમય ટકે છે.
આ પણ વાંચોઃ Lifestyle: મોંઘા કોસ્મેટિક્સ છોડો અને આજે જ અપનાવો આ રાઇસ ફેસ પેક, મિનિટોમાં તવ્ચા બનશે સુંદર!
