વ્યસ્ત દિનચર્યા અને કંટાળાજનક દિવસ દરમિયાન પરસેવો અને પ્રદૂષણ આપણા ચહેરાને નિસ્તેજ અને થાકેલો બનાવી દે છે. ખાસ કરીને બદલાતું હવામાન અને ભેજવાળી ઋતુમાં ત્વચા વધુ પડતી ચીકણી બની જાય છે. આ બધી સમસ્યાઓના કારણે ત્વચા તેની કુદરતી ભેજ અને ચમક ગુમાવી બેસે છે, જેના પરિણામે શુષ્કતા, ત્વચા પર બળતરા અને ચીકણાશ જેવી અસુવિધાઓ ઊભી થાય છે. જો તમે પણ આ તમામ ત્વચા સંબંધી સમસ્યાઓથી કાયમ માટે છુટકારો મેળવવા માંગતા હો, તો બજારના મોંઘા પ્રોડક્ટ્સને બદલે આ સરળ ઘરેલું ઉપાય અજમાવી શકો છો. આજે આપણે જાણીશું કે કેવી રીતે ઘરની જ સામગ્રીમાંથી કાકડીનું ફેસ મિસ્ટ બનાવી શકાય છે, જે ત્વચામાં ભેજ જાળવી રાખવામાં અને ચહેરા પર કુદરતી ચમક લાવવામાં અત્યંત મદદરૂપ સાબિત થાય છે.
ફેસ મિસ્ટ બનાવવા માટે જરૂરી સામગ્રી
આ ફેસ મિસ્ટ બનાવવા માટે જરૂરી સામગ્રી આપણા રસોડામાં જ સરળતાથી મળી રહે છે. આના માટે તાજી કાકડી, થોડું ગુલાબજળ, એક ચમચી એલોવેરા જેલ અને જો ચહેરા પર ખીલની સમસ્યા હોય તો ૩ થી ૪ ટીપાં ટી ટ્રી ઓઈલની જરૂર પડશે. આ ઉપરાંત મિસ્ટ ભરવા માટે એક સ્પ્રે બોટલ જોઈશે.
ઘરે સરળતાથી ફેસ મિસ્ટ બનાવવાની સ્ટેપ-બાય-સ્ટેપ રીત
ફેસ મિસ્ટ બનાવવાની રીત ખૂબ જ સરળ છે. સૌથી પહેલા એક તાજી કાકડી લો અને તેને પાણીથી સારી રીતે સાફ કરી લો. ત્યારબાદ તેના નાના-નાના ટુકડા કરી લો. હવે આ ટુકડાઓને મિક્સર જારમાં નાખીને એક જાડી પેસ્ટ તૈયાર કરી લો. પેસ્ટ તૈયાર થઈ જાય પછી, એક સ્વચ્છ સુતરાઉ કાપડ અથવા બારીક ચાળણીની મદદથી આ પેસ્ટને બરાબર નિચોવીને તેનો રસ એક અલગ બાઉલમાં કાઢી લો. આ કાકડીના શુદ્ધ રસમાં અડધો કપ ગુલાબજળ અને એક ચમચી એલોવેરા જેલ ઉમેરીને બરાબર મિક્સ કરી લો. જો તમારી ત્વચા પર ખીલ કે ડાઘની સમસ્યા હોય, તો આ મિશ્રણમાં ટી ટ્રી ઓઈલના થોડા ટીપાં ઉમેરી શકાય છે. હવે આ તૈયાર થયેલું મિશ્રણ એક સ્પ્રે બોટલમાં ભરી લો. તમારું નેચરલ કાકડી ફેસ મિસ્ટ તૈયાર છે.
ફેસ મિસ્ટનો ઉપયોગ કરવાની યોગ્ય પદ્ધતિ અને ફાયદા
આનો ઉપયોગ કરવો પણ એટલો જ સરળ છે. જ્યારે પણ તમને ચહેરા પર શુષ્કતા કે થાક વર્તાય, ત્યારે બોટલને સારી રીતે હલાવીને ચહેરા પર સ્પ્રે કરો. નિયમિત ઉપયોગથી ત્વચાનું ટેનિંગ ઘટશે, ભેજ જળવાઈ રહેશે અને ચહેરા પર આકર્ષક તાજગી તથા કુદરતી ચમક આવશે.
આ પણ વાંચોઃ Hairfall Problem: હેરફોલથી કંટાળી ગયા છો? નારિયેળ તેલમાં મિક્સ કરો આ વસ્તુઓ અને પછી જુઓ જાદુ...
