રાજકોટમાં ફેમસ છે ગરમાગરમ ગાંઠિયા, સરળ સ્ટેપ્સથી બનાવો ઘરે

• બ્રેકફાસ્ટને માટે બનશે બેસ્ટ ઓપ્શન
  
• મરચા અને ચટણી સાથે વધી જાય છે ગાંઠિયાની મજા
• એરટાઈટ ડબ્બામાં અઠવાડિયા સુધી કરી શકાશે સ્ટોર

વાર તહેવાર હોય કે રજાની મજા માણવી હોય. ગુજરાતીઓ ખાણી પીણીમાં ક્યાંય પાછા ન પડે. જમ્યા પછી પણ જો ગરમા ગરમ નાસ્તો મળે તો ગુજરાતીઓ પાછા ન પડે. આ બાબત કેટલાક ખાસ ગુજરાતી નાસ્તા માટે લાગુ પડે છે. તેમાંય જો ગુજરાતીઓને ગાંઠિયા અને ચટણી સાથે મરચા મળી જાય તો તેમને જલસા જ જલસા. તો જો તમે પણ રજાને ખાસ બનાવવા ઈચ્છો છો તો તમે બહારથી ગાંઠિયા લાવવાના બદલે તેને ઘરે બનાવી શકો છો. આ ગાંઠિયાને તમે અઠવાડિયા સુધી એરટાઈટ ડબ્બામાં સ્ટોર કરીને પણ રાખી શકો છો. સવારમાં ચા સાથે પણ તમે આ નાસ્તાની મજા માણી શકો છો. કહેવાય છેને કે નાની-નાની, કસમયની ભૂખ સંતોષવા માટે આ બેસ્ટ ઓપ્શન છે.

ગાંઠિયા

સામગ્રી

- 500 ગ્રામ બેસન

- 10 ગ્રામ અજમાનો અધકચરો પાવડર

- 10 ગ્રામ પાપડ ખારો (ખાવાનો સોડા)

- મીઠું ટેસ્ટ મુજબ

- તળવા માટે તેલ

રીત

સૌ પહેલા બેસનના લોટને મેંદો ચાળવાની ચાળણીથી ચાળી લેવો. તેમાં અજમાનો પાવડર નાંખવો. (મરીનો પાવડર પણ નાંખી શકાય) પ્રમાણસર પાણી લઇ, મીઠું અને પાપડ ખારો નાંખી સહેજ હૂંફાળુ ગરમ કરો. તમામ વસ્તુ પાણીમાં બરાબર ઓગળી જાય તો પછી તેનાથી લોટ બાંધવો. લોટને સફેદ થાય ત્યાં સુધી કેળવવો. પછી તેલ ગરમ મૂકી, તેમાં ઝારાથી ગાંઠિયા પાડવા. ગાંઠિયા બરોબર તળાઈ જાય તો તેને મરચા અને ચટણી સાથે ગરમાગરમ પીરસો. નાસ્તા માટે આવશે મજા.