ઉનાળામાં ત્વચાની ખાસ કાળજી લેવી પડે છે. ભેજ અને તડકાના કારણે આપણી ત્વચા ડલ બની જાય છે. ટેનિંગ થઇ જાય છે. આવી સ્થિતિમાં લોકો ઘણીવાર ટેનિંગથી બચવા માટે સનસ્ક્રીનનો ઉપયોગ કરે છે. સનસ્ક્રીન ચહેરાથી આખા શરીર પર લગાવી શકાય છે. પરંતુ સવાલ એ થાય કે શું સન સ્ક્રિન લગાવીએ તો મોઇશ્ચરાઇઝર લગાવવુ પડે. અને જો લગાવવુ પડે તો પહેલા લગાવવુ કે
સનસ્ક્રીન લગાવ્યા પછી ? મોઇશ્ચરાઇઝર ત્વચાને હાઇડ્રેટેડ અને સ્વસ્થ રાખવામાં મદદ કરે છે. પરંતુ લોકોના મનમાં ઘણીવાર આ પ્રશ્ન ઉદ્ભવે છે કે શું પહેલા સનસ્ક્રીન કે મોઇશ્ચરાઇઝર લગાવવું જોઈએ? જો તમે પણ આ મૂંઝવણમાં છો, તો તમારે ત્વચાની સંભાળ કેવી રીતે રાખવી તે જાણવાની જરૂર છે.
સનસ્ક્રીન અને મોઇશ્ચરાઇઝર આ બંનેનો ઉપયોગ કેવી રીતે કરવો ?
ત્વચા સંભાળનું પહેલું પગલું ચહેરાને સાફ કરવાનું છે. આ માટે તમારા ચહેરાને ફેસવોશ અથવા ક્લીંઝરથી ધોઈ લો. જો તમે ટોનર કે કોઈ સ્કિન સીરમ લગાવો છો, તો તેને મોઈશ્ચરાઈઝર લગાવતા પહેલા લગાવો. આ પછી તમારે મોઇશ્ચરાઇઝર લગાવવું પડશે. તે ત્વચાને હાઇડ્રેટ કરવામાં અને તેની ભેજ જાળવી રાખવામાં મદદ કરે છે. તે ત્વચાને મુલાયમ બનાવે છે અને મેકઅપ અને સનસ્ક્રીન માટે આધાર તરીકે કામ કરે છે. આ પછી તમારે સનસ્ક્રીન લગાવવું જોઈએ. કારણ કે સનસ્ક્રીનનું કામ ત્વચાના ઉપરના સ્તર પર એક રક્ષણાત્મક કવચ બનાવવાનું છે. જો તમે પહેલા સનસ્ક્રીન અને પછી મોઇશ્ચરાઇઝર લગાવો છો, તો તે સનસ્ક્રીનની અસરકારકતા ઘટી જાય છે.
સનસ્ક્રીન લગાવવા માટેની મહત્વપૂર્ણ ટિપ્સ
SPF 30 કે તેથી વધુ એસપીએફ ધરાવતું સનસ્ક્રીન પસંદ કરો. મોઇશ્ચરાઇઝર લગાવ્યા પછી સનસ્ક્રીન લગાવો અને મેકઅપ કરતા પહેલા તેને 5-10 મિનિટ માટે સેટ થવા દો. દર 2-3 કલાકે સનસ્ક્રીન ફરીથી લગાવો, ખાસ કરીને જો તમે તડકામાં ઘણો સમય વિતાવતા હોવ. જો તમારી ત્વચા તૈલી હોય, તો જેલ આધારિત અથવા મેટ સનસ્ક્રીન પસંદ કરો. શિયાળામાં પણ સનસ્ક્રીન લગાવવાનું ભૂલશો નહીં કારણ કે યુવી કિરણો દરેક ઋતુમાં ત્વચાને નુકસાન પહોંચાડી શકે છે.
