- ભાજપના ગોવાના ઉમેદવાર પલ્લવી શ્રીનિવાસ સૌથી ધનવાન ઉમેદવાર
- અપક્ષ ઉમેદવાર ઇરફાનની સંપત્તિ માત્ર રૂપિયા 100, ગુજરાતમાં 68 કરોડપતિ ઉમેદવાર
- લોકસભા ચૂંટણી માટે 7મેના રોજ 12 રાજ્યોની 95 બેઠકો પર ત્રીજા તબક્કાનું મતદાન થશે
18મી લોકસભાની રચના માટે યોજાયેલી સામાન્ય ચૂંટણીના ત્રીજા તબક્કાના મતદાન માટેની તારીખ નજીક આવી રહી છે. લોકસભા ચૂંટણી માટે 7મેના રોજ 12 રાજ્યોની 95 બેઠકો પર ત્રીજા તબક્કાનું મતદાન થશે. ત્રીજા તબક્કાની ચૂંટણી માટે કુલ 1,352 ઉમેદવારો મેદાનમાં છે. તે પૈકી 392 (29 ટકા) ઉમેદવારો રૂપિયા 1 કરોડથી વધુની મિલકતો ધરાવે છે. આ પૈકી 163 ઉમેદવારો તો રૂપિયા પાંચ કરોડથી વધુની મિલકતો ધરાવે છે. 102 ઉમેદવારો રૂપિયા 2થી 5 કરોડ વચ્ચેના મૂલ્યની સંપત્તિ ધરાવે છે. બીજી તરફ 426 ઉમેદવારોએ પોતે રૂપિયા 10 લાખથી ઓછી સંપત્તિ ધરાવતા હોવાનું જાહેર કર્યું છે. આ બાબત ઉમેદવારોના આર્થિક દરજ્જાનો વિરોધાભાસ છતો કરે છે.
રાજ્યવાર કરોડપતિ ઉમેદવારોની સ્થિતિ પર નજર નાખવામાં આવે તો રાજ્યવાર તે આંકડા અલગ અલગ છે. ગુજરાત અને મહારાષ્ટ્રની વાત કરીએ તે આ રાજ્યો અનુક્રમે 68 અને 71 કરોડપતિ ઉમેદવાર ધરાવે છે. આ આંકડા ભારતના અલગ અલગ વિસ્તારમાં પ્રવર્તી રહેલી આર્થિક વિષમતાની વાત કરી જાય છે. કેટલાક રાજ્યોમાં કરોડપતિ ઉમેદવારના આંકડો મોટો છે. અન્ય રાજ્યોની વાત કરવામાં આવે તો કર્ણાટકમાં 69, છત્તીસગઢમાં અને મધ્યપ્રદેશમાં 37 ઉમેદવારો કરોડપતિ છે. ઉત્તર પ્રદેશમાં 46 તો બિહારમાં 20 ઉમેદવારો કરોડપતિ છે.
