- ઇરાનના સર્વોચ્ય ધાર્મિક નેતા આયાતોલા ખામૈનીએ દેશના પરમાણુ કાર્યક્રમ સંદર્ભે અમેરિકા સાથે વાત કરવાનો સૂર વ્યક્ત કર્યો છે. તેમણે કહ્યું કે, દુશ્મન પર ભરોસો કરી શકાય નહીં પણ વાત કરવામાં કંઇ વાંધો નથી!
- ઇઝરાયેલે ઇરાનની જમીન પર હુમલો કરીને હમાસના વડા ઇસ્માઇલ હનિયાને મારી નાખ્યો એ પછી ઇરાન વળતો પ્રહાર કરશે એવું માનવામાં આવતું હતું પણ એવું થયું નથી. ઇરાનની દશા માઠી છે એટલે હવે તે કોઇ જોખમ લેવા ન માંગતું હોય એવું લાગે છે
હમણાં સુધી અમેરિકા અને ઇઝરાયેલને જોઇ લેવાની વાતો કરતા ઇરાને અચાનક સૂર બદલીને વાતચીત કરવાની તૈયારી બતાવતા આખી દુનિયામાં આશ્ચર્ય સર્જાયું છે. ઇરાનના સર્વોચ્ય ધાર્મિક નેતા આયાતોલા ખામૈનીએ ટેલિવિઝન પર એક વીડિયો સંદેશમાં એવું કહ્યું કે, દુશ્મન પર ભરોસો કરી શકાય નહીં પણ તેની સાથે વાત કરવામાં કંઇ વાંધો નથી. અમેરિકા અને ઇરાનની દુશ્મની પાંચ દાયકા જૂની છે. ઇઝરાયેલ અને હમાસના યુદ્ધ બાદ ઇરાન અને અમેરિકા વચ્ચે ડિસ્ટન્સ વધ્યું છે. એક રીતે જોવા જઇએ તો અત્યારે ઇઝરાયેલ સાથે ઇરાન જ પ્રોક્સી વોર ખેલી રહ્યું છે. લેબેનોનના હિઝબુલ્લાહ અને યમનના હૂતીઓ ઇરાનના ઇશારે જ હુમલાઓ કરી રહ્યા છે. ઇઝરાયેલે હમાસના વડા ઇસ્માઇલ હનિયાની ઇરાનમાં ઘૂસીને હત્યા કરી નાખી એ પછી સ્થિતિ સ્ફોટક થઇ ગઇ હતી. ઇરાને તાબડતોબ બેઠકો બોલાવી હતી અને લડી લેવાની તમામ તૈયારીઓ કરી લીધી હતી. એવી વાતો થતી હતી કે, હવે ગમે તે ઘડીએ ઇરાન ઇઝરાયેલ પર સીધો હુમલો કરી દેશે. ઇસ્માઇલ હનિયાના મોતને મહિનો થઇ ગયો છે, હજુ સુધી ઇરાને ઇઝરાયેલ પર સીધો હુમલો કરવાનું જોખમ લીધું નથી. અમેરિકાએ પણ જરૂર પડ્યે ઇઝરાયેલની મદદ માટે પોતાની સેના ગોઠવી દીધી હતી. જે રીતે બધા એક બીજા સામે બાંયો ચડાવી રહ્યા હતા એ જોઇને ત્યાં સુધીની વાતો થવા લાગી હતી કે, હવે ત્રીજું વિશ્વયુદ્ધ નક્કી છે. ઇરાન સમસમીને બેસી રહ્યું એ એક જોતા બહુ સારું થયું છે. જો ઇરાને યુદ્ધ શરૂ કર્યું હોત તો આખી દુનિયા માટે નવી મુશ્કેલીઓ પેદા થઇ હોત. હવે જ્યારે ઇરાને વાત કરવાની તૈયારી બતાવી છે ત્યારે નિષ્ણાતો એને સારા સંકેત ગણાવી રહ્યા છે. દુનિયા ઘણા વર્ષોથી કોઇને કોઇ આફતોનો સામનો કરી રહી છે. પહેલા કોરોનાએ આખી દુનિયાની દશા ખરાબ કરી નાખી હતી. હજુ વિશ્વ કોરોનાની અસરોમાંથી મુક્ત થયું નહોતું ત્યાં રશિયા અને યૂક્રેન વચ્ચે યુદ્ધ ફાટી નીકળ્યું. આ યુદ્ધ લાંબું ખેંચાયું અને હજુ ક્યારે પૂરું થાય એ કહી શકાય એમ નથી. આ યુદ્ધ દરમિયાન જ ઇઝરાયેલ અને હમાસ વચ્ચે યુદ્ધ છેડાયું. અમેરિકા જેવા ખમતીધર દેશ સહિત સમગ્ર વિશ્વના દેશોના અર્થતંત્રો ખખડી ગયા છે. હવે દુનિયા શાંતિ ઝંખે છે.
ઇરાન પણ હવે થાક્યું હોય એવું લાગે છે. ઇરાન પોતાની આંતરિક સમસ્યાઓથી ઘેરાયેલું છે. સતત ટેન્શનમાં રહીને લોકો કંટાળી ગયા છે. હિઝાબ આંદોલનના કારણે પેદા થયેલો રોષ હજુ અંદરખાને ભભૂકી રહ્યો છે. અમેરિકાના આકરા પ્રતિબંધોના કારણે ઇરાનની ઇકોનોમી બગડી છે. દેશના સર્વોચ્ય નેતા આયાતોલા ખામૈની હવે બુઢ્ઢા થઇ ગયા છે. 85 વર્ષના ખામૈનીમાં હવે અગાઉ જેવું જોમ રહ્યું નથી. ઇરાન એક સમયે મુક્ત અને આધુનિક હતું. આયાતોલા ખામૈનીએ ઇરાનિયન ક્રાંતિ કરીને અમેરિકાને સમર્થન કરતા ઇરાનના શાહ મહોમ્મદ રઝા પહેલવીનો તખ્તો પલટાવી નાખ્યો હતો. ખામૈનીએ ઇરાનમાં શરિયા કાનૂન લાગુ કર્યો હતો. હવે જનરેશન બદલી ગઇ છે. દુનિયા પણ હવે પહેલા જેવી રહી નથી. ઇરાનના સત્તાધીશો જો નહીં સુધરે તો બીજી ક્રાંતિ થશે એવી વાતો પણ ઘણા સમયથી થઇ રહી છે.
